Wat is.

Kromstok

kromme stok die bovenaan een ladder werd bevestigd, het geslachte varken werd eraan opgehangen

Gerry Boetenwaarf.

Gedicht

Eerdoags

t Kómt,
ik vuil het soezen
van mien kop
tot aan mien vouten
t is nog nait
goud aan kook
moar k wait:
eerdoags
zel ik mien
aigen dook
votjoagen mouten

Eerdoags
as ales ien mie
broest en jagt
mie dwingend om
roege roemte vragt
zel ik
mie lóaten drieven
en schrieven

Eerdoags
teer ik
witwachtend vel
lach ik
kiep ik
mien kaar volledeg
om
tot ik
loesleeg bie
aaldoags zun
oetkom

De Schriefster

Noam: Gerry Boetenwaarf
Geboren: 1953 ien Zoltkaamp
Woont in: Zoltkaamp
Schrift al: vanoaf mien elfde
Schrief zowel ient grunnegers as ient Hollands en ook heb ik wel ais wat ient Ingels, mien laivelingstoal, produceerd.
Ient grieze verleden heb ik wel ais wat publiceerd ien Krödde en ik heb drij boukjes schreven. Twij binnen oetgeven bie Profiel. Eerste hait 'Ien t Licht' en der stoan grunneger en Hollandse gedichten ien. Twijde bouk bie Profiel hait "Kunt U even bijlichten"en bevat Nederlandse columns. Daarde bouk is hailndaal ient Hollands, hait "Slechts met U" en stait ook vol mit gedichten. Dij drij boukjes goan over t geleuf en binnen schreven noa de onverwachte dood van mien pa en mien schoonmoeke, negen doagen achter elkoar, ien 1986. Hiervan ston ons weerld goud op zien kop en gingen wie n joar laank deur n dal van veul verdrait, moar t geleuf het ons deroet hoald. God Zulf troostte ons en sunt dij tied schrief ik over t geleuf, omreden ik elk gun wat ik kregen heb: Zien rust, vrede en bliedschop.
Zoas zoveul schrievers heb ik ook veur de klas stoan, zowel bie t gewoon onderwies as bie n asielzuikersschoul en bie n schoul veur Zeer Moeilijk Lerende Kiener, ien Fraislaand. Ook heb ik n zetje bie een streekblad, de Hogelandster, waarkt as journalist/redacteur.
Ik waark al sunds 2011 nait meer ien t onderwies, moar ik verveel mie nait: ik schrief veur n tekstbureau, heb n poar bouken vertoald, vanuit t Duuts en vanoet t Ingels, geef Nederlandse les aan n boetenlandse vraauw, schrief ien ons kerkblad en heb t doarnoast drok mit mien man, ons vaaier kiener, schoonkiener en zeuven klainkiener. Ik maag haile geern lezen, braaien en fietsen en ik proat geern mit minsen en hol van gezelleghaid.

Ie ook?

Ie schrieven ook gedichten in t Grunnegs en willen dij hier ook wel zain loaten?
Kiek den even op de openingsbladziede en vul t formeliertje in.