Hilda Schipper.

Gedichten.

Zolt in de kovvie

As ik zo allaine in mien koamer zit
Mit mien kovvie veur mie
Din wait ik weer
Hou of ik die mis.
Nou drink ik mient allineg
t Is ook net
of t aans smokt as vrouger
sums ist
of dr teveul zolt in zit.

Jan '91

Zeekobben op pier

Het schaarpe geluud
Van misthoorn op t eende
Van de pier
Scheurt mist
En mien trommelvliezen
Aan flarden.

Viskeluu voaren
As ganzen achter n kander
Hoaven oet.
Mien hond bozzelt
As bezeten
Achter elke zeekob aan.

Ze lakken heur uut,
Met schel geluud. En
Vlaigen vlak veur heur op.

t Wotter aan mien vouten,
kabbelt, of t aans
niks te doun het.

Kom maid, zeest doe, zeg ik,
Kom wie mouten weer,
Kom op wie mouten weer
Mouten weer wieder.

Feb '91

De Schriefster

Noam: Hilda Schipper
Geboren:
Woont in: Wirdum
Schrift al: 25 joar

Over miezulf.
Ik schrief aal hail wat joaren. Op ulo-schoul begon dat. Mor dou maistieds in Nederlands. Mien kennismoaken mit Grunneger toal was, wat dr vrouger in 'Damster kraant' ston. klaine verhoaltjes. Ik kon ze amper lezen.
Mit dizze oetsproaken heb ik aal hailwat zegt. Ulo is dr aal laank nait meer, is aal mavo west en is nou vmbo. Dus bin ik nait ain van de jongsten meer. Damsterkraant: joa ik bin geboren Damster. Woon aal 35 joar in Wirdum. Aan waark heb ik van alles doan. Oproem-en schoonmoakwaark, kantoorwaark, archiefmedewaarker bie n woaterschap, loketmedewaarker bie postkantoor. Mit zukswat heb ik mien studie betoald. Ik bin zo'n 20 joar schouljuf west. Humanistisch vormingsonderwijs. En doarmit kon ik de volgende studie betoalen. Ik heb in Utrecht aan de Universiteit voor Humanistiek studaairt. Noast mien aigen praktijk aan hoes, waark ik in een verzörgingshoes in Veendam, het Wildervanckhoes.
Hobby's binnen dr vanzulf ook. Wie hemmen een grode toen, mit altied genog te doun. Mien man en ik rieden aal joaren motor, en noast mien schrieverij bin ik voak aan het weven. Kinder? ain dochter, ain schoonzeun en ain klainzeun, inspiroatie genog dus.
Schrieverij is aiglieks wat begonnen as oetpebaaiern. Mien eerste verhoalen in t Grunnegs binnen zo'n 25 joar leden ontstoan. Der is ook wel ais wat in kraant verschenen, en in dörpskraant. hier en doar wat in boukjes van Lopster schriefwedstried.. Veureg joar in het nije kerstboukje.
Nou, dat was t wel zo'n beetje. ducht mie.

Ie ook?

Schrieven ie ook gedichten in t Grunnegs, en willen ie ze hier ook wel publiceren?
Kiek den aains op de Openings bladziede en vul t formeliertje in.