J.B. Oosterman.

Knoppie raaisde in koffiebonen
Suker en beschuten.
Prees zien woare ook wel aan
Moar t mainst de mooie puten.

Grootmoe zet zuch n bakkie troost
Moar zol gaauw besluten.
Zitten slechte bonen in
dij aibels mooie puten.

In de kraande van vandoag,
Waarven ze recruten.
Priezen ain en aander aan,
En... de mooie puten.

Neerlands jeugd: 'Let op Uw Saeck.'
De Duutsers blieven guten.
Goie koffie ken je aan
de slichte grieze puten.

December 1944

Toun k nog zo'n klaaine proater was
En soms te dicht bie t woater was,
Ruip moeke: 'jonkie kom hierheer,
Boesjeude pakt die nog ain keer.'

k Wör oalder en wat wiesder ook.
Ik leuf nait meer aan hekse en spook.
In daip en de geude,
Doar zit ja gain boesjeude!

As koopman gaait mie t nait noar t zin.
Goudkoop verkopen, duur koop je in.
t Mout aans of k roak in de geude
Moar k duur nait, want d'r is n boesjeude.

10 november 1941

Hail gezellig zat ain kluppie
Over d'oorlogstied te proaten
Nait het minst van d'onderzeeërs,
Dij veul van zich heuren loaten.

Haarm, zegt in ains: "Moar jongens,
k Leuf dat gainent van joe nog wait
Dat op splinterneie guldens
Ook ain onderzeeboot stait.

Hier is n nije, mout je ais kieken
Of de boot te vinden is
En mag joe t onmeugelk blieken
Wies k joe om, dat is gewis."

Eerst kikt d'aine, din kikt d'aander
Moar gain aine zugt hom nog
t Is onmeugelk om t te vinden.
"Wies ons t moar, of is t bedrog?"

"Kom moar aan, din zek joe t wiezen"
Zai goan aalmoal om hom stoan,
"Kiek hier" wat nou? Wel verdorie
Hai is net onder woater goan."

Geert Kwast is ain potige kerel
En ook nog hail loat soms bie t pad
Voak heur je hom den aanderdoags zeggen:
"k Heb weer een gevallegie had".

Ik ree al wat loat deur de bosweg
Sprong mie n kerel sikkom veur t rad
Om mie van mien geld oaf te helpen
Moar k was op zien knepen vervat.

Ik vruig om: "Wat zel hier gebeuren?"
Hai keek ais en studderde dou
Omdat hai t nait recht vertraauwde:
"Goienoavend, hou loat hèwwe t nou?"

Ik gaf hom ain klap op zien bakkens
En zee: "t Is haalf twaalm veur dij t vragt
En k zol nou moar moaken dat k vortkwam
Veur t volle twaalf uur op die slagt."

Agnietje kwam ain oavend loat
nog aan de pasterij.
En vruig meneer pastoor om road.
t Was over trouwerij.

"Zo, wil je trouwen en met wie?
Is het een goede vent?
Die wel zijn plicht en bovendien
ook goed zijn godsdienst kent?"

Zo was de vroag van de pastoor
"O zeker" zee ze dou.
"Hai dronk wel ais n borrel
moar is draankbestrider nou.

Hai ging apaart om mie der bie.
t Is toch zon knappe jong
En t oge wil ook wat. Wat zeg ie!"
Toun wis pastoor hou t gong.

"Nu! Trouw dan maar doch hoor dit goed
dat wie soms dronken wordt,
zich duizend maal verbeteren moet.
t Gegeven woord is kort."

"Wees moar gerust pastoor, ik zel
hom hollen aan zien woord.
As ik nait wil dan löt hai t wel
dat het mie nooit bezwoard."

Noa zes moand op ain oavend loat
Ain dikke douk om t heufd.
Toun kwam ze schraivend weer om road.
"O, haar k joe toun moar leufd."

"Nou binn wie trouwd, hai zopt altied
komt hail voak dronken thuus,
en ik dou toch zo goed mien vliet.
Moar k heb de helle in huus."

"Vannoavend muik hai weer lawaai
En sluig mie, kiek meneer.
n Boele as n hounderaai
op t oge. Wat dut mie t zeer."

"Ja, kind t is erg en t spijt me zeer.
Maar klaag nu niet te gauw.
Want zei je niet de laatste keer
Dat t oog toch ook wat wou?"

Ailt Kiekuut ston bie zien hekkie
en keek noar de opkomende moan.
Ik zag dat hai mit mie wol proaten
en k bleef doarom wat bie hom stoan.

"Dij moan" zei hai, "t is toch n wonder
zo mooi as dat liekt aan de locht.
Hai is net as n meester in t schoule
zo tussen de steerns heb k docht."

Lest wol mie der aine vertellen
dat hai aal dij steerns omhoog
mie wel bie noamen kon nuimen,
moar k wait veurvast dat hai t loog.

Ik zeg moar, hou zol hai dat waiten?
Gain aine is ooit zover west.
En om t mit ain kieker te lezen
mie dunkt, dat gait toch nait best.

Joarlieks voaren Jan en Hinderk
Veur t febriek op Boareveld
En verdainen mit heur baiden
Ieder keer n mooi sìnt geld.

Elk om beurten speult veur kokkie
En zörgt veur de eterij
Jan veuraal moakt zich het drok bie
d'Eerappels mit zoepenbrij

t Slimste is nou dei dure bagel.
"Hendrik, jong, t is bienoa op.
Hou krieg wie wat veur ons kachel?
Prakkezaaier doar ais op."

"Wacht den, loat mie moar es kieken
Of k vergees wat kriegen ken.
Veurdat k koop, wil k eerst wat woagen.
Kiek, doar voart Kloas Jansen hen."

"Doar aan boord bin zeuven wichter,
k moak d'r doadelk roezie mit.
En k mot mie al slim vergizzen
As nait aine mit bagels smit."

"Joager! Trek wat aan, wie willen
t schip doar veur ons gauw veurbie"
Aine van de wichter heurt dat
en zai ropt: "Wat mouten ie?"

"Wol j'ons misschien stokkend voaren?
Zeker ook nog binnendeur.
Wie binnen nait gedaind van ploagen.
Kom dou es dichter bie ons, heur!"

Hinderk gooit heur mit n eertap.
Zai gooit mit n bagel weer.
En nou t ainmoal an de loop is,
Komen der oal meer en meer.

Ale wichter binnen aan t gooien.
Bagels vlaigen om hom tou.
Endelk wordt t wel wat voldounde.
"Joager!" ropt hai: "vort moar gauw."

Hai aan t tellen, vief en tachteg
Bagels binnen in t proam beland.
Hai lacht. Ainmoal s weeks zon roezie,
Geft goudkope winterbrand.