Jan de Jong.

Bloumen dik op t roam
aal snij boetenom
Kachel is oet
paitereulie is op
t Is gloepenst kold
Bin over tachtig
k vuil mie nou toch old

t Achterhoes woagenwied lös
zunschien op kop
Bloumen stoan in blui
t is orreg waarm
Net, tou liester zong
Bin over tachtig
k docht, ben nog orreg jong

Hai stoarde ín de verte
zien ogen waren nat
t Kwam nait deur de wind
dij waaide over t wad
Hier har ze stoan
stil, t was heul vrumd
Störm zol d'r kommen
mooi weer was doan
Haildaal in verbiestern
zag graauw om snoet
Vuilst die wel goud
Nee har ze zegd
t is oet

k Vrözzelde heur
onstumeg narende hoaren.
Haisterg, wuivend
ien n glìnne wiend.
Slovve glimmers
dij schieterg lagen
zeggen genog
ze grient.

Ien n diezege locht
vlugt ze
proekeg snokkend vot.
n Roezeg verrepeld'ervoaren.

Veurbie, vot is t.
Stoefzaik, iezelk stil
wat achterblift
stommelg
aan diggels knovveld.
Eernsachteg ien laifde vergist.

Laangoet
tegen n dampoal.
Wieds
gruin gras
n laiwerke.
Wied vot
n diek.
Golden groan
t wirrelt.
Stille
daipblaauwe lucht.
Gunder n boerenploats
vèr achteroet
gain vogel vlucht.
Roemte
hoal daip oam
gain dreum.
Echt woar
doar.

Pakst mie bie haand
en kikst.
Stil, zunder geluud
zink ik vot
ien t spaigelgladde
daibe blaauw.
Schiensel van t vuur
ien dien ogen
woar k mie aan waarm.
n Lutje tuutje
glinstert zaacht.
Ruzzelnde wimpers fluustern
hollen mie vaast
kommen dichtbie.
n Smokje op mien mond
zet mie deel
mit waike knijen
op grond.

Troosteloos, diezig en nat
n Klain, schaif hoeske
onner aan diek doar bie t wad
Hai huuverde, keek oet roam
gat aan kachel, hai leek wel oet
Handen vaaln hom deel
bie t eten van zien stoet
Docht aan zien vraauw
Hou laang was t nou leden
Kwam in t henne, muizoam en stram
In t achterhoes bie de klompen
heurde sik dat hai kwam
Boeten keek e omhoog noar graauwe lucht
Doezeleg in kop, bie achterhoes was t glad
Ruip om zien vraauw
toun n hail daipe zucht
Sik har veur t lest stoet van hom had.

Twijduustern vaalt
gestoag over swaarde kloeten.
Ien n troage diezege zucht
graauw en huverg nat.
n Plougd laand
knovvelt deur n kòlle wiend.
Dij tiedens routduuster
vertwieveld wacht.

n Nije vrizze mörgen
dook ras deur zun verjagt.
Ien stilleghaid bezain
mit golden stroalen opkloaren.
Steelskewies omaarmd
deur onstumeg ruzzelnd raait.
Moagdelk onwis
van de doad, dij t dammee wacht.

Grode heldere oogjes
daip en daipblaauw
Nemen aal in zich op
je dreumen d'r in vot
Leutje knovvelege knoestjes
Waiten nog ains nait
wat ze griepen mot
Nöchtern aankieken
in stille stilleghaid
Omgeven deurgronden
wat d'r te gebeuren stait
Dit luddek wonder
zo kwetsboar en teer
k Goa terug in herinnern
Allìnt van dij tied
wait k haildaal niks meer
Striek zaacht n waang, n smokje
Kon k mor ainmoal vannijs
zo wezen as dit lutje potje.

Aal grode mensen waren west
toun was ik pas aan beurt
Woar bist ain van, kin die ja nait
zegt mor jong, bist ja lest
Mag ik n pond haalf om haalf
Doe proatst zo zaacht, k hebt nait goud heurd
wat dut dien pabbe, kin ik dij wel
En welke kerk goan joe noar tou
hest ook n moeke, vertel
Of komt dij hier nait vot
Woar wonen joe din
hest sìnten bie die, toch wel genogt
Ik zai t aal wel, ein sìnt te min
Goa gaauw noar hoes, lot sìnten mor hier
din kinst ook nait verlaizen
Ik kon nait aans, wat mos ik din
Mit pien in t lief, haildaal nait goud
kon ik noar hoes of raaizen
Boetendeure aaide ik òl 'Blekkie'
Docht votdoadelk hier vandoan
en t allertlaifste nait weerom
Mor n grieze snoet en n hangend oor
dij kin k ja nait allain loaten stoan
Terug bie slachter aan de deur
greep mie t aal weer bie d'haals
Noa laang wachten vannijs aan beurt
lot mie dien sìnt mor zain klonk t vaals
Hier hest gehakt en n stukje worst
joag 'Blekkie' dammee vot
Ik heb hom laang stief knovveld
dij laive olle hond
En t stukje worst dat wol aains nait
t bleef liggen veur deur op grond
Bie t kolenhok achter schuur
vot noa t waarme eten
Heb k gehaktbal gaauw tot buus oethoald
en 'Blekkie' hom opvreten
Stil hebben wie doarzoot zeten
begrepen nander goud
Binnen grode mensen din nait klaain west
vergeten ze wat dit mit joe dout
As ik toch loater groot bin
en klaaine kinder klaain
Din hol k doar aargenswoar reken mit
dat zol je mor es zain

Hai brobbelt, stìnt en poest aldernoarst
vergrèld is ze, de beer is weer n moal los
Zwoare braide aiken worren noarsteg omzoagd
aalgedurig veul keboal in n groot duuster bos
Aarms zwaaien in t rond bainen trillen en beven
kriegt aal drokker want put mot d'r oet
En nou mot t doan wezen mit dien gehaister
k wil ook wel n moal sloapen dit duurt nou aal even
Stief stöt z'hom aan roupt haard hol d'r mit op
kiek ains op wekker t is nait te geleuven
Wil die nait laanger zain gaist d'r mor oet
nacht is hoast om aal bienoa haalf zeuven
Draai mie nog ains om en perbaaier wat te sloapen
die nait meer heuren wilst dat wel leuven

Zwoare nevel
woazeg
Dikke lucht
Pien op de borst
benaauwd
Vingers tinteln
n daipe zucht
Kovviepot leeg
sjekpuut ook
n Gevuil dat
haile wereld vergait
In smook

Hai zat aan t wotter
Snokte, troanen vaaln in t gras
stief prakkezeren
Hou t nou met zien pabbe was
Aal zeuven joar
Een aigen knien
drei krikken met n hoan
D'r was zo niks aan
zunder pabbe
Hou wieder goan
Moeke har zegt
stel die nait aan
D'r is niks om te janken
Joen pabbe is vot
het e aan hom zulf te danken
Guster vrij
Docht, k blief hier nait thoes
wat mot k hier doun
Bie Opoe n glas ranja
Wat mot ik nou
met voetballen, vissen, knienhok verschonen
Mien Pabbe, woar is e noar tou
Volgens Moeke komt nait goud,
k dou alles verkeert
Begriep d'r ja ook niks van
heb t van mien Pabbe leert

Mit heur baiden
op bankje bie kerkhof
Tas stief op schoot
hai zundagse houd op
Heur noaber was dood
t Is aigenliek roar goan
Kin d'r nait bie
Mor zo was e t pad kwiet
haildaal in t verbiestern
Wat oaderverkalken dout
Hai kon t wel begriepen
n emmer witkalk,
din komt ja nait goud
Ze keek hom aan
wie motten noar hoes
Joa, zee hai toun
doe waist pad
Blieft ons noaber hier?
das ja ook wat.

De wereld vrome gedachten.
Op t aanrecht n vroren kalkoun,
dij op waarmte ligt te wachten.
Mit n boom deur hoes hìn zeulen.
Lutje keerskes flonkern.
Katten kribberij onner toavel.
Mit kindje Jezus,
oet t krubke aan t speulen.
t Was mor even, ons hondje
het boom vot wodder geven.
Bie kaggel, lekker eten en n glaske
zain wie teevee.
t Nijs en kérstgedachten.
Van mìnsen dij aal joar vergees,
vannijs op 'Vrede op aarde' wachten.

n Vrundelke oardige man
geduldig en laif
Altied hard waarken
tot ongemaarkt dat onbegriepelijke kwam
Joaren was e allend
hai redde zich goud
Klaainkinder waren wies mit hom
Opa luusterde, kon alles, haar tied
Ze zain d'r goud op weerom
Nait te geleuven
woarom, zee zien dochter
Zukke vrumde dingen dee e aans nait
t Wer nog slimmer
Wait nait meer wel ze binnen
zien aigen dochter en klaainkinder
Kiek hom doar stoan
Krom en gebogen
leunend op zien stok
Stil, stoaren hail wied vot
met zien daip blauwe ogen
Zain ze wel wat
Woar mot ik hen, woar bin ik
woar is alles nou
Bin aal boudel kwiet
woar goan wie noar tou
Hulpeloos, zien scholders omhoog
begriep d'r haildaal niks van
Zien ogen vroagen
help mie nou
Ik wait t echt nait meer
k hol mie stief aan die vast
Dij onmacht, dij dee mie zo zeer