Meta Oost.

Mien aigen olle grieze
dij uut Dreende kwam
zette mien haart in vuur en vlam
Joa, hij muik mie hailmoal van de wieze

Mit zien Puch en zien spiekerjassie
op olle widde gympen, n board en kroes hoar
luip hij mit zien wichie in t openboar
Zai zaten zulfs aains op n terrassie

t Was ain uniek persoon, da's woar
doar zel mor zo gain twijde van wezen
aans zol hij joa nait uniek wezen
en waaren wie nait west, ain poar

Ik kin mit plezaaier terugge denken
aan onze eerste joaren soamen
verkeerntjestied, smokken of roezie moaken
vekaansie soamen en wat kin k nait aal bedenken

Nou daarteg joar loater, is hij gries
weg bien zien wilde hoaren
mor zien haart klopt noa al dij joaren
nog veur zien aigen wichie, wat is hij wies

Minsen onder mekoar
moaken t zuch voak zwoar
zij binnen eerlieks en oprecht
Wat krom was, wordt recht
en aans om
Woarom

Proat wordt t er over en weer
over gevuilens, sums dut t zeer
gooie bedoelingen verkeerd uutlegt
Wat krom was, wordt recht
en aans om
Woarom

Din in aains wordt gefluuster
nait te verstoan, moar luuster
woorden worden verdraaid, echt
Wat krom was, wordt recht
en aans om
Woarom

De muren om mie tou fluustern
ik zit t er stil noar te luustern
perbaaier t gefluuster te verstoan
mor zie spreken ain toal zunder noam
t is as t gefluuster van de wind
van bloaren op t witte grind
dai in haarfst weg worden bloazen
geliek as wotter zunder gloazen.
Ik perbaaier mien gedachten te vangen
veur ze verdwienen in stil verlangen

Hou laif is joen laifde
joe laiver as joen laifde,
joen laifde veur joezulf
Is nait groter as joezulf
vuilen veur joen gelaaifde
Dij laifde van joe baaide
dij joe vuilen allebaaide
is ain zeldzoamhaid
in tied van lösbandeghaid
Binnen ie ain veurbeeld
veur t toukomstbeeld
van onze jeugd.

De laifde dij wie veur mekoar vuilen
is gruit ons leven laank, joar noa joar
Wie binnen soamen aine worden
dat ging nait vanzulf, mor over horden
De allergrootste test kwam wel
toun mien zaikte kwam in t spel
Ain zaikte dij nait weer over gaait
en altied noast ons staait
Onze laifde is staark bleven
Wie zellen soamen dij zaikte overleven

Ain mooi stukkie Wildervank
Doar omringd deur hoge bomen
Woar je altied weer kinnen komen
Altied even stil stoan kinnen
Bie dij, die van joe héngoan binnen
Doar woar rust en stilte vanuut stroalt
Ain mooi plekkie deur zunne bestroald
De hoge bomen wiezen noar t licht
Woar zai binnen in laifde en evenwicht
Doar vuil je joe weer noa aan mekoar
Waiten je dat ook over huil veul joar
Dat stukkie Wildervank nog bestaait
Veur altied tot in de aiweghaid
Joen laifsten droag je in joen haart
Zo binnen je altied soamen, nait apaart
Mor te waiten dat doar op begroafploatse
Doar in Wildervank rust joen noaste
Geft n goud gevuil, geft joe rust

d'Er is wat aan de haand mit mie
Ik bin aans as n aander, zeggen ie
Doar mot ik joe geliek in geven
Ik loop soms verstiefd te beven
Ik vuil mie din as n zunderling
Dij ploatst is boeten de ring
Van wat normoale minsen binnen
En al wat normoale minsen kinnen
Heb ik deur mien zaikte meute mit
t Liekt soms of gain aine joe begript

Vrouger was alles aans zeggen ôl minsen
Zai zollen aingelieks winsen
Dat t nog net zo as vrouger was
Dat alles nait zo jachteg was
Dat minsen ais tied hadden veur joe
En nait altied mor roupen, nee moe
k Heb nou even gain tied
As ze nait oppaasen bin ze joe kwiet
Meschain dinken ze din loater
Ons moe was aigenlieks nait zo'n proater
Mor ja zai hadden ook noeit tied
Aankomend nij-joar is de beste tied
Dat te goan veraandern, n nije kaans
Om ains uut te springen uut dij daans
Dij mallemeulen van t leven
Woarin zo waineg tied is om te geven
Ains stil te stoan bie n aander zien gevuil
En nait altied allenneg mor huil
Allenneg bie joe zulf