Roel Sanders.

Ainmoal komt veur elkenaine tied,
dat der n end kompt aan t leven.
t Volk wil heur nog laank nait kwiet;
haar ons ja nog veul te geven.

Hail voak geven wie n haand in ons bestoan
en zeggen mainsttied: "Tot n volgend moal!",
mor ains komt t ofschaaid veur t leven,
din is t veurgoud en dat geldt veur ons aalmoal.

Elkaine wil, as t kin, geern hail laank leven,
bie zetten verwachten we van toukomst nog n hoop.
mor HAI doarboven, kin dij elk mensk nait geven,
en tied is gelokkeg, veur gain gold te koop!

As tied der heer is, op t moment, dat gainain paast,
as, noar ZIEN idee, joen levenstoak hier is volbraacht.
Holdt mekoar din, stilzwiegend, n pooske, hail stief vaast,
dat is, wat der bie n ofschaaid van mensken wordt verwacht.

t Woord 'sjaloom' staait veur: VREE
en komt noa t overwinnen van de ree.
Tevree wezen mit joen aigen bestoan,
Dat is t pad, dat elks mout goan.

'Sjaloom' betaikent: gain oorlog meer,
zo veur elkenain n finoale ommekeer.
Laifde in ploats van le t geweld,
dat is, wat touverdan allent nog telt.

'Sjaloom' is meer, as mor n woord,
dat elkenaine t mainst bekoort.
Tevredenhaid mit aal wat leeft
en aan t leven zoveul slinger geeft.

Gun ok d'aander, wat of je zölf groag wilt,
zunder dat aine zok deraan vertilt.
Hol aaltied van joen noaste as van jezölf,
din komt de echte VREE vanzölf.

Zel t in Israël ooit echt worden ervoaren?
Mit zo'n riek oorlogsverleden sunt joaren.
Leren ze ains mekoar verstoan?
En doar in VREE leven goan?

As n mens t laifste ofstoan mout,
de laifsten dij man het op dizze eerde.
Kinder aan joen zörgen touvertrouwd,
din verlust t leven wel aan weerde.

Meschain kin man t begriepen,
wat of joe zo voak bedruifd moakt.
Al kinnen zie nait in t haart kieken,
dat dij troanen aal lopen loat.

k Zag joe doar op t kerkhof stoan,
bie t ofschaid van joen kinder.
Elkenain haar in zien oge n troan,
t verdrait lat zok nait hindern.

As troanen ains opdreugd binnen,
vangt t bestoan vanzölfs weer aan.
Ok as joe t nog slim meuilek vinden,
wereld trekt zien aigen plan.

Elk het in zien haile leven,
wel momenten, dat t nait zint.
Mor de moud din nait opgeven,
wat n aander der ok van vindt.

Kop der veur en scholders der under,
wereld draait doch wel weer deur.
Mor verwacht nog mor gain wunder,
luuster nait noar aal t gezeur.

Zun komt ok veur joe weer op,
noa de nacht wordt t aaid weer licht.
Zörg, dat j in toukomst weer volop,
oetzicht holden mit roemer zicht.

Ains komen der weer bedere tieden,
ok n lagje brekt weer deur.
Loat de moanden mor verglieden.
biet op taanden en goa der veur.

k Wens joe nog veul staarkte tou,
in dizze onmeuglek zwoare tieden.
Hol nkander steveg vaast, in toukomst en nou
en loat joen laifde nait oet haanden glieden.

k heb n vroag, n hail klaaine vroag.
Woarom is der aaltied wel aargens oorlog ?
dat hoat elk weldenkend mensk ja, doch?
veuraal veur onschuldege kinder is dat n ploag !

k Heb n vroag, n hail klaaine vroag.
Woarom hoaten paardie lu mekoar aaid mor weer ?
Da' s doch nait zond en brengt hail wat zeer.
Hol der mit op, as t kin nog vandoag !

k Heb n vroag, n hail klaaine vroag.
Woarom doun mensen nkander zo'n verdrait ?
dat verdaint joen aargste vijaand nog nait.
Schenk laiver laifde, dat zugt elkain groag !

k Heb n vroag, n hail klaaine vroag.
Woarom is der aaltied wel aargens hongersnood ?
ondaanks aanwezege eterij laaidt t tot onneudege dood,
da' s vandoag de dag doch gain stoere vroag !

k Heb n vroag, n hail klaaine vroag.
Woarom is er in wereld zoveul terreur ?
geef aigen schuld tou, deurbreek dizze teneur.
Plietsie en polletiek griep doaders in kroag !

k Heb n vroag, n hail klaaine vroag.
Woarom binnen op eerde zoveul lu zunder waark ?
Binnen veul femilies pineut, of klinkt dat te staark.
t Komt overaal veur, bie aal mensken, oet elke loag !

k Heb n vroag, n hail klaaine vroag.
Woarom hebben n bult lu zoveul zörgen ?
t Wreekt zok n moal, of t nou vandoag is, of mörgen.
t Is min veur gezondhaid, joen haart en moag !

k Heb n vroag, n hail klaaine vroag.
Woarom krigt n mensk zoveul laid op zien bord,
elk wait ja ok wel, wat er dudelk aan schort.
Gain God en gain Jezus meer, dij man wat vroagt !

k Haar n vroag, n hail klaaine vroag.
Woarom zo waaineg laifde, gain vree of vree,
kwamen mensken mor endelk ains weer tot ree,
dat brocht din in haarten gelok, zölfs zunder gevroag !

t Daipste laid blift veur ons voak verbörgen,
veur t grootste gelok schaiten woorden tekort.
Onbekende toukomst boart ons grode zörgen,
terwiel t meschain nooit ondroag'lek wordt.

We willen in alles zo geern noar Hom leven,
juust als der wat beurd, wat ons nait sint.
Din vroagt Hai ons n haand te geven
en laidt ons wieder als Zien kind.

Hai zet ons aaid in t lieke spoor,
gift ons de rust, dij wie groag willen.
Helpt ons oet laifde t haile leven deur,
aan Zien woord kinnen w 'ons nooit vertillen.

As t grootste bezit herinnern wordt,
niks en gainaine ons meer kin schelen.
Miljoenen troanen worden oetstort,
maggen we ons verdrait mit Hom delen.

Op t kerkhof vindt n minsk gain troost,
mor even kin t bie t verwaarken helpen.
As man t verdrait mor nait laank koost,
den troanen leer je hier nooit stelpen.

Rood is n kleur van de regenboog,
elk mìnsk kikt wel ains omhoog.
Deur de resten van de regen,
komst dij boge dikmoals tegen.

Oranje is n kleur van de regenboog,
as je hom zain, is t mainsttieds weer droog.
Hai schittert aan hemel in schiere kleuren,
t is net of eerde vannijs weer gaait kleuren.

Geel is n kleur van de regenboog,
dij staait aan hemel as n bloumentoog.
t Is veur ons n taiken van Gods verbond
en is onverbreekelk; doarom is e rond.

Gruin is n kleur van de regenboog,
ontstoan oet twij kleuren en nait oet n loog.
Noeit zel d'eerde deur n zondvloud vergoan,
zodat dizze wereld veur n mìnsk blift bestoan.

Blaauw is n kleur van de regenboog,
n goave van God, allewel mìnsk Hom bedroog.
t Is gain verdainst, mor schier genoa,
wees daankboar en traauw en denk aaid goud noa.

Indigo is n kleur van de regenboog,
veur lu wied vot, den ie staait aarg hoog.
n Kedo van Hom, dij ons onderholdt,
as taiken van Laifde van wel van Hom holdt.

Violet is de kleur van de regenboog,
n Prachtege kleur, dij der ok nait om loog.
Wie hebben dij zomor om niks dou kregen,
as bewies van Zien Laifde veur ons haile leven.