Trijny Menzinga-Wolf.

Gedichten.

Haarfsttied

In donkre duustre doagen, heur ik de haarfst.
Hai geselt de netuur, met woeste vloagen.
De tied, dij kleurt de bloaren, in tinten van t palet.
De lucht van rötte bloaren, kropt bie mie omhoog.
Joa de haarfst is weer aan zet.
Ik roek de prikkelnde lucht, dij mien longen openzet.
De zun zet alles in n golden licht.
Haarfst is mooi... net n gedicht.

Joargetieden

k Wor wakker, dou mien ogen open.
Ik zai druppels as troanen,
laangs de roamen lopen.
De wind striemt over toen...
en legt de bloumen plat, asof
de zummer ons vergat...!
t Is woar, de haarfst dij komt der aan.
Zo zel het joar noa joar vergoan,
Altied een nij zeizoen in ons bestoan...!!

De Schriefster

Noam: Trijny Menzinga-Wolf.
Geboren: Sibboeren op 12-08-1946
Woont in: Woldendörp
Schrift al: n joar of wat

Mien afeer was kleuterlaidster in het mooie dörpke Wolndörp, woar ik al sikkom vatteg joar woon, met mien man. Wie hebben twij kinder,(n jong en n wicht) en twij prachtige klainkinder. Bin al wat joaren aan loop met dichten, ook in t Nederlands. Der het ook al wel es wat van mie in Toal en Taiken stoan.

Ie ook?

Schrieven ie ook in t Grunnegers, en willen ie dat hier ook wel zain loaten?
Kiek den ais op de Openings bladziede en vul t formeliertje in.