Wendy Potze.

"Janneke kikst even of der wat in de buzze zit?" roupt pappe. "Oke" roupt Janneke trugge. Der zit hail veul post in de buzze en Janneke kikt even veur wel t aalmoal is. Inains zugt ze n knalrode envelop woar Janneke Moaier op staait. Nijschiereg kikt ze der in. He n uutneudeging veur n playbackshow!

"Mamme! Mamme! Doar wik geern aan mitdoun" roupt Janneke.
"Van mie magst wel mitdoun" zegt mamme. "Moar wel wist dan playbacken?"
"Oh, dat bedenk ik nog wel" zegt Janneke. "Ik goa noar Majjan hen hor!" en weg is Janneke.
As ze bie Majjan is zugt ze dat Majjan de uutneudeging ook al kregen het.
En Majjan wil ook mitdoun. Ze hebben al opbedocht wel ze willen playbacken noamelek Roxette met t laidje Silver Blue. Dat vinden ze aalbaide n mooi laidje. As ze t laidje op de radio luustern goan ze n beetje op bedenken hou ze der bie goan daansen. Janneke het dit laidje n moal op televisie zain dus ze wait ongeveer hou ze motten dansen. Dan motten ze nog oetmoaken wel de zangeres wezen mot. En dat wordt Janneke.

De volgende dag goan ze zuch drekt op geven veur de playbackshow. Janneke en Majjan hebben de kleren, de make-up, en de proeken al in de tazzen zitten. Dan goan ze weg. Op n lieste zuggen ze dat ze as loatste optreden motten.
"No ja" zegt Majjan "t spreekwoord zegt: Lest Best, dus loaten we dat mor hopen". Inains zuggen ze op de lieste de meester stoan, der stoat bie dat e Andre van Duin playbackt. "Dat wuk zain" zegt Janneke. "Jo ik ook" zegt Majjan.

Der binnen hailveul groepen dai t goud doun, mor der binnen ook veul slechten bie. Dan is de meester aan de beurt. Hij het twai verschilnde sokken aan en zien trui het e binnensteboeten aan. Hij zugt der hatstikke gek oet moar hij dut best wel goud.

Noa n zetje binnen Janneke en Majjan aan de beurt t gaait hail goud.
Dou ze kloar waren ging de jury overleggen wel de beste was. Dou kwam der n man van de jury op t toneel stoan, om te vertellen wel aalmoal n pries wonnen hebben.
De meester har de daarde pries. Hai daansde t uut van bliedschop.
De twailing Ineke en Tineke hadden de twaide pries, ze playbackndn n laidje van The Cover Girls.
En dou wuit spannend, want wel har nou de eerste pries? Janneke en Majjan heurnde nait wel de eerste pries wonnen hadden, moar n poar klasgenoten zeden dat zai t waren, moar ze geleufden t nait.
Dou zee de man t nog n keer en zai waren t wel, dus gingen ze noar t toneel. Ze kregen n haile grote beker en viefteg gulden dai de drekt verdailen. Noa de playbackshow was der nog n klaaine verlötten.
Janneke en Majjan waren hail bliede met hun pries en ze waren van plan dat as der nog n keer n playbackshow was ze weer mit zollen doun.

(Noaschrift van de redaksie: Mit dit verhoal won Wendy de daarde pries bie de Grunneger Schriefwedstried van gemainte Stadsknoal in 1994.)