Joakop Kupers.

Verhoal.

Broene hulsies.

Wat doun wat aigenliek nait mag is altied mooier en spannnender west dan andersom.
Sins mensenheugenis bennen der ja al schoulen in de Euliemulderstroade, kinder hebben der altied al oaf en an lopen, ook kwoajonges dij biedehand bennen. Dat begon voak al in de zesde klazze.

Op de houk van de Euliemulderstroade en de Meeuwerderderweg was vrouger n winkel woar je tiedschriften kopen konden, allerlei soorten veur groot en klain. De aigender, n nait zo'n grode man, laip nogal muiliek, zeg mor maank en zat mainstieds in zien ketoortje de administroatie te doum, of met zien klanten te bellen.

De winkel haar gain etaloages, wel hongen der allelei tiedschriften an waskniepers an horizontoal spannen taauwchies achter de roamen.
Twij van dij taauwchies, veur t roam in de Euliemulderstroade, waren vol hongen met blode of hoalf blode doamesbloadjes.
De aigender haar ter hoogte van bustes of loagere dailen hail netjes der broenpepieren hulsies omtoudoan en an de achtekant vastplakt.
Mor ze zaten nait vast an de bloadjes, nee, want dij mogten nait schonden worden.

Dat was vanzulf bie de opschoten jonges zo bekend en dat was roef de winkel in, deure open stoan loaten, dan rad zo'n broen pepieren hulsie noar beneden tikken en dan as de sodemieter de winkel weer oet.
Veur dat de aigender, dij muiliek ter bain was, de winkel in komen kon was de doader al weer vlogen.
Wat loater stonnen de grode jonges zug te vergoapen an dij blode doames dij nou zichtboar waren.

Dat vergoapen duurde noeit zo laank omreden zo'n oploop vuil de aigender vanzulfs zo op en den schoof hai de hulsies der weer om tou.

Dan wer de tegenzet nomen, de flinkste de winkel weer in en weer aine noar beneden tikt.
Dat ging zo en dan deur tot dat de aigender der wat op von, hai plakde de hulsies vast an de bloadjes, mor dat wissen de jongens nait.

Op n moal, hup de winkel in, tikkie der op, mor der gebeurde niks, dan nog mor rad n tikkie, en dan wat haarder, mis wast, de tik was zo haard ankommen dat de droad met alle bloadjes noor beneden kletterde.
Veur dat de jong de winkel oet kommen kon was de aigender der al.

Der was dou wat aans te zain as blode doames. Jong het wel twij doage met zien hannen an zien kont vuilt en wel n weke nait zitten kennen.
Aigen schuld, dikke bult.