Dag van de Grunneger Geschiedenis.

Zotterdag 21 oktober 2006, 11.00 - 17.00 uur.

---

In t gebaauw van de Grunneger Archieven, aan t Cascadeplaain in Stad, was zotterdag 21 oktober 2006 weer de 'Dag van de Grunneger Geschiedenis'.

t Themoa dit joar was 'Geleuf en Ongeleuf', t wuir nait allend n dag over mor ook mít ons noabers, Vraislaand, Drint en Ost-Vraislaand.

Open

Eddy de Jonge opende de dag sekuur om elf uur.
Dou huil Haarm van der Veen n inlaaiden veur de dunderpreek van domie Bijler (Jan Walma), zoas hai dat dee in verband mit t beruchte sodomieproses van t Foan.

Archiefrechtbank

Olle zoaken kwammen vannijs veur de rechter en t pebliek as jury oordailde mit, Nij Pekel en Onstwedde wazzen haalfweg negentiende aiw aan t kribben over t onderhold van kinder dij in steek loaten wazzen.

Boukenmaarkt

Op de boukenmaarkt stonnen omenbie tien boekhandeloaren heur woar aan de man/vraauw te brengen.

Te biecht bie de dichter

As ie wat op joen gewaiten haren den konje t kwiet bie de dichter in t biechthokje.

Lezens en waarkwinkel

Lezens en waarkwinkel over Geleuf en Ongeleuf. Hendrik de Cock, deur Gert van Klinken, De kerstening van onze streken, deur Egge Knol, over religie en theekultuur in Ost-Vraislaand, deur Friedemann Rast, waarkwinkel over biebelOmtoalen in t Grunnegs, deur Marten van Dijken.

Veurstellens

Fons van Wanroij brocht verhoalen en laidjes over Grunnen, Stadsdichter Ronald Ohlsen druig gedichten veur, Meindert Talma en The Negroes brochten volkslaidjes mit (asmis iezelke) ploatjes oet t Gronings AudioVisueel Archief.

Der was nog meer

De Kruderij oet Winschoot verkocht streekproducten. De povvertjeskroam was der, en de draaimeulen.

De kwis

Traditiegetraauw was der de Grunneger Geschiedeniskwis as ofsloeten van de dag, presentaaierd deur Reinder Smith (RTV Noord). Zudemoa het t wonnen!

Om even veur vief uur was t doan.

| Dag van de Grunneger Geschiedenis 2003 | Dag van de Grunneger Geschiedenis 2004 | Dag van de Grunneger Geschiedenis 2005 | Dag van de Grunneger Geschiedenis 2006 | Dag van de Grunneger Geschiedenis 2007 | Dag van de Grunneger Geschiedenis 2008 | Dag van de Grunneger Geschiedenis 2009 | Dag van de Grunneger Geschiedenis 2010 |

---