Dag van de Grunneger Geschiedenis.

Zotterdag 11 oktober 2008, 11.00 - 17.00 uur.

In t gebaauw van de Grunneger Archieven, aan t Cascadeplaain in Stad, was zotterdag 11 oktober 2008 veur de twijentwintegste moal de 'Dag van de Grunneger Geschiedenis'. t Themoa dit joar was 'Verhoalen van Grunnen'.

Open

Eddy de Jonge opende de dag om elf uur.
Driek van Wissen druig zien meroakels schiere gedichten veur. Pefester dokter Maarten Doevedak gaf t startschot (nait letterliek) veur de mannefestoatsie 't Verleden van Grunnen' woarbie ook t 'Histories joarbouk Grunnen' aanboden wér.

Appels, Trekkers, Dörsmesien

De Noordelijke Pomologische Verainen was der ook weer. Onstwedder Gaarven was der mit olle trekkers en n dörsmesien.

Lezens, rechtzoak.

Remy van Schaik huil n lezen over de kruustochten, Henny Gruinendiek over hunebedden, Henk Bouls over Johan Wilm Ripperdoa, John van Zuthem over 'boer, aarbaider en òfschaiden', Hidde Feenstroa over 'Grunnen tussen oost en west', Erwin Karel over 'achtersteld Grunnen', Catrien Santing over 'Geleerdhaid aan raand van beschoaven', Otto Knotnerus over 'veulkleurege refermoatsie' en Maarten Doevedak over 'Grunnen op Europese schoal'.
'Bier en kwoadhaid in IJmentil' was tuddel van archiefrechtbaank in n zoak over t stoapelrecht. Mit n krougboazin oet IJmentil dij slim lélk was op Stad, omreden zai niks te zeggen haren over t bier wat zai verkopen mos, man, man, wat was dat n kwoad wief.

Demonstroatsies restauroatietechnieken

n Stoffeerder, glas in loodmoaker, dekoroatieschilder en stukedoor luiten zain hou zai waarken.

Boukenmaarkt, schrievers, povvertjeskroam

Boukenmaarkt was der weer as elk joar.
Ie konnen aan proat goan mit schrievers, mor dat deden der leuf ik nait veul...
De kroam mit meroakels lekkere povvertjes was der ook weer, de ston deurlopend n riege veur.

De kwis

De Grunneger Geschiedeniskwis was ditmoal wat aans opzet, n gong nou mit 'petje op petje òf', dailnemers konnen oet twij antwoorden kaizen, veur d'ain deden je pet op, veur aander ... ie roaden t aal. Reinder Smith presentaaierde t weer. Bie n vroag over woar Gasunie zat veur dat ze noar Stad kwammen vuilen kandidoaten bie bulten òf, zulfs mien poedie... Der wazzen nog mor twij over, Janet Roze het t wonnen, zai kreeg n schiere pries oetlaangt.

Der was nog veul meer.. Ik kon weer nait alles op petret zetten... Omreden ik kon nait overaal weden.

Jacob Nijboer