Dag van de Grunneger Geschiedenis.

Zotterdag 16 oktober 2010, 11.00 - 17.00 uur.

Klik op de foto's veur vergroten.

In t gebaauw van de Grunneger Archieven, aan t Cascadeplaain in Stad, was zotterdag 16 oktober 2010 veur de vaaierntwintegste moal de 'Dag van de Grunneger Geschiedenis'. t Themoa dit joar was 'Laand en wotter'.

Open

Om elf uur wuir de opening doan deur Eddy de Jonge, t was zo vol in hal dat lu deur nait meer inkonnen...

Pé en Rinus zörgden veur n baarg lol mit òlle en nijje laidjes.

In de studiezoal wazzen weer veul organisoatsies woar ie vanalles gewoar worden konnen over vanalles.

Appels en Povvertjes

De Noordelijke Pomologische Verainen was der weer mit heur biezundere appelrassen, de povvertjeskroam haar t hail dag drok, gelokkeg zat wind in goie houk aans haren lu gain poederzukker op heur povvertjes holden.

Armstrong's Patent

Zai zongen waarklaidjes zunder meziek mit n shantyman (veurzanger) en zeelaiden.
De laidjes dij Armstrong's Patent zingt, stammen oet de gloriedoagen van de zailvoart en wuiren zongen aan boord van klippers, walvisvoarders en zukswat meer.

Visserijmuseum Zoltkamp

Der wazzen demonstroatsies visbakken, genoatpellen, oalroken en nettenbouten deur de lu van Zoltkamper Visserijmuseum.

Boukenmaarkt

Boukenmaarkt was der weer om te snuustern of der nog wat van joen goading bie was.

Demonstroatsies restauroatietechnieken

Ambachtluu luiten heur affeer zain.

De kwis

De Grunneger Geschiedeniskwis gong ditmoal mit zuudwester óp zuudwester òf, t wazzen aiglieks parrepluutjes, mor dat mag ie nait wiedervertellen.
Dailnemers keken zo slim noar mekoar dat der te waineg òfvuilden. Reinder Smith was al deur zien twinteg vroagen hén dou wazzen der nog n stuk of zeuven over. n Ekstroa vroage mos de deurslag geven, dat dee e ook.

Der was nog veul meer.. Zörg dat ie der aanderjoar bie binnen, den is t de viefentwintegste moal.

Jacob Nijboer