Feestlaid.
Lustig gezellen,
Schoart joe moar vrolek om de dis!
k Zel joe vertellen,
Wat hier zo aal is.
Vrolek zingt, eet en drinkt!
t Smoakt ja zo lekker hier!
Grunneger molleboon, kouke en bier.
k Heb gain sigoaren,
Moar wel n lekker piep tebak;
Wilt dij nait spoaren
En rookt mit gemak!
Vrolek zingt, eet en drinkt!
t Smoakt ja zo lekker hier!
Grunneger molleboon, kouke en bier.
Het nou ain ieder
Zo'n mooie piebe in de mond,
Din nemt hai t glas moar weer
En klinkt ais rond!
Vrolek zingt, eet en drinkt!
t Smoakt ja zo lekker hier!
Grunneger molleboon, kouke en bier.
Stoetbrug mit keze
Of wel mit schinkevlaais d'r op,
Eet zunder vreze,
Moar eet joe gain stop!
Vrolek zingt, eet en drinkt!
t Smoakt ja zo lekker hier!
Grunneger molleboon, kouke en bier.
Dou ze mie vruigen,
Om hier te zingen mit mekoar,
Luit k mie nait nuigen:
Ik ston doadelk kloar.
Vrolek zingt, eet en drinkt!
t Smoakt ja zo lekker hier!
Grunneger molleboon, kouke en bier.
Fris op, gezellen,
Hoalt moar de vlagge hoog in top;
k Zel niks vertellen,
Aal ston je ook op kop!
Vrolek zingt, eet en drinkt!
t Smoakt ja zo lekker hier!
Grunneger molleboon, kouke en bier.
Tekst A. H. Smith. Schreven veur de "Grunneger Jachtwaide" op de folkloristische feesten te Arnhem in 1919, woar t deur vaaier "Grunneger wichter" zongen wuir.
|
