Roel Sanders.

Verhoal.

Grootknecht Rieks

Rieks Hebels wis t aaltied beder. Van jongsofaan was t al n maalhibbel west. Muik zien olden Harm en Geessien n bult te doun.
Op legere school was e niet wieder komen as klas vaar en omreden e te old wér van school doan.
Wat der oet hom gruien mos, zien moakers zollen t bie God nait waiten.

Femilie Hebels, haardwaarkende, socioale lu, dij eerst aan n aander dochten, eer zie aan heur aaigen toukwamen, zaten din ok mit haanden in t hoar.
Wat mossen ze mit dij minkukel aan? Dou ze noa n haile zet van valen en opstoan, finoal mit Rieks euvel aan ruiken, har Jan Waanders n oplössen aandroagen.
As t jong vuilde veur t boerenwaark kon e op zien stee teregte.
n Stee van roem viefentwinneg bunder aigenaarfde grond woar Jan soamen mit wat waarkvolk n beste plak stoede verdainen kon. As Rieks wol, kon e bie hom aan t waark komen.
Dat was nait tegen dovemansoren zegd. t Jong greep kaans mit baaide haanden aan.

Veur haile femilie was t n kedo oet hemel. Rieks har n poar beste haanden aan t lief en deed in vrije netuur zien best nuver wat oet stro te zetten.
Leerde doagelks van boerknecht Evert en akkedaaierde tot elks tevredenhaid mit boer en ovrege waarknemers. Mos wel ains aanpeerdjed worren, mor da zol jonkhaid ja wel wezen?

t Was din ok gain vrömd idee hom tot grootknecht te bevordern dou òl Evert oet tied kwam.
Veureerst göng t oareg nuver, mor dou kreeg Rieks verbeeldens. Dee wat hom in kop kwam en dat was nait veul zoaks.
Verkeren mit Annechien Wiggers, n schier wicht, ruik oet en dou was der gain goud goaren meer mit hom te spinnen.
Hou boer ok pruit, hij luusterde veur gain meter. Noa n baarg woarschouwens was bie Jan görde goar.
Wel nait heuren wil, mout vuilen. Wol zien boerenploatse nait noar zien grootje loaten joagen deur zo'n snötneuze, dij aiveg en aaltied t leste woord hebben wol en t waarkvolk veurtiedeg van t aarf juig.

Leste tied leek t verdikkeme wel of bie Rieks n weke oet zes zundoagen bestond. t Waark mag wel veur dommen wezen, ok n grootknecht is der veur t waark. Karbenoadje vlugt nait oet zochzölf op bord van boer en ok speklappe veur n aarbaaider mout wel verdaind worren.
Hou t Waanders ok begroodde, hij mos hom doan geven. Mit zo'n hampelman was ja nait te leven.
t Jong har nog n bult proats ok, mor was noa n hoop gebandies doch ofraaisd.

Rieks mout oetendelk op n eerabbelmeelfebriek te laande komen wezen.
Boer kreeg n nije grootknecht, woar e mit aaien en plougen kon.
Op t bedrief floreerde t weer as vanolds en t kamnet voar der wel bie.
Mit steedse honden kin je gain hoazen vangen en elks het in zien haand n grode W stoan. De W van waarken.
Veur niks gait ja zunne op. In biebel stait nait zomor, dat meens noa zundeval, in t zwait van aal wat e zut waarken mout.
Zunne scheen weer op ploatse en Rieks wer in t vergeetbouk schreven.