Gerhard Tuinema.

Verhoal.

De Gebroeders van Dam (dail 6)

Vervolgverhoal, schreven deur Gerhard Tuinema.

Taande en Elzo sloapen as koien, mor Jurrie wuilt mor al deur t bér.
Hai ligt zo ongemakkelk op vlouer en hou e zok ook draait, t helpt gain spier.
Nou ligt e weer op rug en kikt persies tegen n dreuge schink aan, dij mit n hoak aan baalk hangt.
Kerel, wat krigt e in ainmoal zin aan n plakje dreuge schink. Hai draait zok om, mor ieder bod mout e weer noar dij schink kieken.
Ain zo'n plakje schink, wat zol dat ter lekker invalen. Hai wil wel leuven dat e din ook veul beter sloapen kin.
Hai kin best gijhonger hemmen! Doarom kin e bepoald ook nait sloapen!
Mor hou krigt hai doar nou n plakje of... Zulf is e mor klain en beun is nogal hoog.

Elzo zel der makkelk bie kinnen as dij op toafel staait, mor mit hom zel t nait zo makkelk goan.
Jurrie kin t op n duur nait langer volhollen. Hail veurzichteg kropt e onder dekens vot, lustert of taande en Elzo nog vast sloapen en hoalt din zien knipmes oet boksembuus.
Taande en Elzo snurken aingoal deur, dus dat is in order. Hai schoft n stoul bie toavel en hail veurzichteg kropt e zo omhoog.
Even loater staait e midden op toavel, net onder schink. Hai moakt zien mes open en wil n beste plak van schink ofsnieden.
Mor dat wil nait mit ain haand, vernemt e wel.
Aander haand mout biespringen, mor dat zit nait zo glad, omreden doar mout e onderboksem mit vasthollen.
Zo gaauw as e mit twij handen aan t waark wil, zakt onderboksem hom op hakken. Hou nou!
Wacht ais, as e nog n beetje hoger stoan gaait, wil t vast beter.
Kerel, wat het e toch zin aan zo'n dreug plakje schink...
Hai weer van toavel of en din gript e n stoof. Ziezo, nou zel t wel beter goan.

Wèèr kropt e op toavel, mor nou kin e der toch beter biekommen, vernemt e wel.
Toch vaalt t nait tou, zo mit ain haand snieden. Aander haand pakt weer tou, mor doar gait onderboksem weer omdeel.
Heurt e taande? Nee, ze slept nog rusteg deur. Ze het zok misschien even op aander zied gooid.
Mor is hai nou boas of is e gain boas! Hai zel en hai mout n plakje schink hemmen.
Man, hai wordt ja net zo flaauw as wat. Wacht ais, dat e doar ook nait eerder aan docht het. Zo kin t ja mooi! Jurrie moakt onderboksem aan n knoop van bezoen vast, zodat e nou baaide handen vrij het.

Zo, nou gaait t vast beter. Net wil e t mes in schink zetten, as taande mit kop om bedsteedeur komt. "Kist beter n trappen nemen, Jurrie, t is zo wel wat onhanneg nait?"
Jurrie schrikt zok in ainmoal hoast n ongeluk. Hai let schink in ainmoal lös, draait zok n kwartslag om, stoof begunt te wiebeln en din het e gain holvast meer.
Mit n zwaai glidt e overzied en veur e goud en wel begript wat ter gebeurt, ligt e laankoet op vlouer.
Stoul nemt e in loop mit en stoof komt hom achternoa. n Hels lawaai!

Elzo schrikt wakker, kikt om zok tou en springt in ainmoal van bér of. "Wat is hier te doun!"
"Jurrie wol aan t zolder schonen, ducht mie", zegt taande en komt ook in nachtjak van ber of.
"Mien gommes", schrikt Elzo, "hai het t mes open in haand. Wat wost wel omhaans hemmen, Jurrie?"
"k Bin flaauw", morrelt Jurrie. "k Wol mie n stukje schink ofsnieden, mor t is mie n beetje mishottjed."
"Doe leerst t ook nooit", zegt taande en kropt weer op ber.

Elzo is nog weer zo goud en snidt Jurrie n beste plak schink of en zo komt alles op n duur weer in rust...

Wordt vervolgd!