Gerhard Tuinema.

Verhoal.

De Gebroeders van Dam (dail 27)

Vervolgverhoal, schreven deur Gerhard Tuinema.

En zo lopt Jurrie van Dam, de keuterboer oet t laand, as n hin dij aai nait kwiet kin deur stad. Och, och, och, wat is t ook n boudel as joe t zo tegen lopt.
Nooit haar e zok ophollen mouten mit zo n knieneslachter, mit zo n vorrejeude, mit zo n loezebos. Dèr! Dàt is t, n loezebos, n zoepkaalf, n deugenait, n slampamper. Te loi om wat te doun, mor altied kloar as e der ain deurhoalen kin. En mit zoain holt hai zok op! Schoamen mag e zok.

As zien ol minsk dàt nog mitmoakt haar, haar ze zok wis ogen tou kop oet schoamd. En Hennie... Ho, wacht ais! As Sambo der nait west haar, was e nooit mit Hennie in aanroaken kommen. Hai kin nou aal wel schèllen en foetern op dij vorrejeude, mor dij het hom toch mor even aan Hennie hulpen. Dat môje nait wegpoesten. As ie joe der al bie deellegd hemmen dat je as ainspaanjer joen doagen slieten mouten en der wordt joe din in ainmoal zo n fetuun in schoot gooid, din hèje mazzel en dik mazzel ook! Het Hennie nait zegd dat ze zok overschrieven luit en din mit hom onder de geboden ging?

Hai, Jurrie van Dam, in t bakje. Donder Detje, stel joe dat ais even veur. Dag en nacht zo n bloum om joe tou, want n bloum dat is ze, datzulfde wicht. En dij het hai toch mor even aan de hoak sloagen. As n jongkerel is e der op ofgoan en hai het heur smokt of t veur hom doagelieks waark was.

Nee, as t puntje bie t poaltje komt, het e n bult aan Sambo te danken.
En dij Sambo zit nou in t hok as n misdoadeger dij k wait nait wat doan het.
Jurrie schudkopt ais as e zo hail allain deur stad lopt. Asmis komt hom der nog ain tegen, mor veul lopt ter nait meer bie pad en weg. Jurrie dut ter n stapke bie.

Laive tied, wat zit e der weer lelk tussen. Bus vot en hai in stad. Hou komt e weer thoes?
Bie Hennie blieven dat kin nait, dat màg nait! Al zol hai t ook wel willen, Hennie vast nait.
Zokswat paast nait as je nait traauwd binnen. Der zollen mor proatjes van kommen en dij binnen der al genog in de wereld. Der mout wat op vonden worden, mor wat?

Zo, aal vol van gedachten, komt e weer bie Hennie's hoes. Van verren zicht e al dat ze nog op is. Wel wait, misschien is ze wel haildail oet stuur. Mor naauw het e aan bel trokken of deur gaait al open.
Hai, k bin bliede das ter weer bist. k Zat ter al glad over in. Mor eh... woar is Sambo? Hest hom nait vonden?
Jurrie let deur in t slöt valen en lopt achter Hennie aan noar koamer.

Din begunt e te vertellen. Hai het gain mooie haand van vertellen. Hai haspelt t spul wel ais n beetje deur mekoar, mor Hennie wordt toch gewoar hou de zoak zok toudroagen het.
Dus, nou zit Sambo nog in t hok? Dij komt nait veur mörnvroug weer lös en din krigt e ook nog n flinke boute, dou doar mor denken om. Mit doen volk moaken ze körte wetten.
Laive tied, stel die ais veur dat ze die vasthollen haren vannacht. k Haar ja gain minuut rust in hoes had.

Mor hou kom k hier weer vot, vragt Jurrie.
Laive tied, dat is ook zo. Bus is zeker al laank vot. Joa, da s nait best. Kist hier nait blieven, dat gaait nait. Kist wel in Goarkeuken sloapen, mor din bist mörnvroug zo loat weer thoes. Baisten mouten heur gerak ook hemmen, dij binnen der toch al schoarem langs kommen leste tied.
Da s almoal goud en best, mor doar kom ik nait mit thoes, zegt Jurrie.
Jô, is vanzulf nog ain meugelkhaid, zegt Hennie, mit n taxi. Mor dat komt k wait nait hou duur. Toch Jurrie jong, der zel wel aans niks opzitten. t Begroot mie ainlieks wel, mor as t nait aans kin mou k mor deurpakken!

Nou, din nait langer soezen. Waist wat, ik zel wel even opbellen. Hier vot bie is n telefooncel. Wacht mor even.
Hennie is der nog gain twij minuten weer as der veur t hoes al toeterd wordt.
Heur, zegt Hennie, doar s woagen al. Nou mien jong, zörg mor dast thoes komst. Ik goa mörn wel even noar Elzo. Blief doe de eerste doagen mor stil thoes en zörg dat t spul op glee komt. En mien jong (as ze dit zegt strikt ze hom even onder kin deur) nog n week of wat en ik ben der om die mit te helpen.

Zo en nou most votgoan, want chauffeur wordt al ongeduldeg. Mit n poar doagen kom k wel even bie die. Din bogt ze zok veurover en geft hom n dikke smok.
Jurrie wil heur der nog n stuk of wat overhin geven, mor Hennie dut deur al open en din het Jurrie gain kans meer.

Wordt vervolgd!