Gerhard Tuinema.

Verhoal.

De Gebroeders van Dam (dail 40)

Vervolgverhoal, schreven deur Gerhard Tuinema.

Jurrie lopt van ain stee noar aander. Woar en woar is dat Hennie? Hennie het genog aan zokzulf en doarom mout taande Jurrie op glee helpen.
Jurrie krigt zien pak aan dij e kregen het dou e veur t eerst mit Hennie kennis moaken zol. Vol is der nog even weer instreken en zodounde kin hai wel veur n dag kommen.
Hai wil net boksem aantrekken as taande zegt: Jong wat wist nou. Hest ja nog gain onderboksem aan!
Elzo knivvelt haardop en Jurrie wait nait woar e t zuiken mout.
In kaast nait, op ber nait, naargens kin e onderboksem weervinden dij Hennie kloarlegd het.
Hai hèt ter mit lopen, mor woar e hom loaten het mag Joost waiten.

Taande gaait ook mit aan zuik en dij hoalt hom op n duur tou schuur oet, noast peerdstaal.
As e boksem en bezoen aan het mout taande der weer over tou, want hai kin boor nait vaast kriegen. Doar zicht taande ook gain kans tou en zo mout Hennie der nog weer heer. t Is mor n soes, din het dij t veur mekoar en as ze Jurrie zien beteuterd gezicht zicht, geft z hom gaauw n doetje.

Din gaait ze mit strik aan t knooien, zo n nijmoodse, zo n zulfbinder. Jô neem mie nait kwoalek, zegt Jurrie, mor hou mòje zo n ding ainlieks vaastkriegen. Laive tied, dat heb k ja nog nooit eerder beleefd.
Ik kom weer net op tied, zegt Sambo din bie deur en mit staait e ook al in koamer.
Wacht mor jong, dat zel ik wel even veur mekoar moaken. t Gaait mit hangen en wurgen mor op n duur krigt Sambo t toch veur mekoar. Sambo zel mit noar t Gemaintehoes. Hai het net zo laank soesd tot ze tougeven hemmen. Nou goan ze mit twij auto s hin.
Jurrie en Hennie in veurste en Sambo en Taande in achterste. Din liekt t teminzen wat!

Hennie het heur troost achter zöcht. Mit aal dij kerels kin ze vanzulf nait in koamer wezen en doarom is n dag of wat teveuren timmerman Mulder der west om achter n hokje of te timmern. Zo dag en deur kinnen ze doar best wezen, benoam bie zummerdag en din holt ze koamer teminzen n beetje op stee.

Jurrie begunt op noagels te bieten. Woar zol Hennie toch wel blieven? Aal ogenblikken kinnen auto s veurrieden en din mouten ze kloar wezen. Taande gaait ais kieken, want as ter op aankomt is z ook nijsgiereg.
Hennie het gain mins verteld wat z aantrekt, alledeegs Jurrie nait.
Net wil Jurrie ook noar achtern goan as deur open gaait en Hennie der inkomt. En din verget Jurrie mond weer dicht te doun en Sambo om mond open te doun en dàt wil wat hemmen...

Nou en hou liekt t? Hennie blift in koamerdeur stoan en mout wel lagen om de beteuterde gezichten van baaide manluu.
Ol taande komt vlak achter heur aan en t olske vrift zok mit schoet over ogen, zò is ze oet stuur.
Nou, t is ook gain wonder, want zo as Hennie doar staait is t krekt n jonk wichtje. Heur gezicht is ain glans en t is net of der gain gelukkeger mins op wereld is as zai.
Sambo is de eerste dij weer wat zegt. t Is zunde, zegt hai. Wat e doar mit maint wait e misschien zulf nait, want zo n proat roast ja naargens op.

Jurrie wait ainlieks nait goud wat e zeggen mout. t Komt allemoal zo onverwachts. t Is allemoal even nij en ongewoon. Zò het e Hennie nog nooit zain en hai krigt n kloet veur keel van de zenen. Hai s ook n beetje baang, omreden hai nou wel zicht dat e toch wel n olle knapzak is bie Hennie vergeleken. Hai kikt ais bie zien nij pak langs en din kin e hoast nait leuven dat ze straks n span binnen.

Zò mooi is Hennie aans aal nait optuugd. Mor de menaaier woarop zai t goud dragt geft juust dat bizundere der aan. Ze dragt n donkerblaauw mantelpakje mit n gries streepke der deur. n Wit bloeske dij ze der onder het, stekt ter mooi bie of. n Klain biepazend houdje mit n gedientje der veur het ze op en t hoar komt ter guteg onder vot.
n Poar mooie zieden kouzen en n poar van dij nijmoodse schounen. Pumps nuimen ze dij mit n dik woord, moaken t spultje kompleet.

n Boeket bloumen het ze over aarm liggen. n Nuver wiefke is t en nait aans. Duurst zò mit mie Jurrie, vragt Hennie as Jurrie nog mor aal niks zegt.
Jurrie slokt n moal of wat, mor t is krekt of e tong verloren het. Din lopt Hennie op hem of, slagt ain aarm om hom tou en geft hom n dikke smok.
Och mien jong, mor doe huifst toch nait te schraiven? Hennie wait aal nait wat ze der aan het as ze zicht dat Jurrie zok nait meer inhollen kin. Troanen lopen hom bie wangen deel...

Och loat mie mor even, snokt Jurrie en mit kop in handen schraift e zok in kroakstoul oet.
Hennie gaait noast hom stoan, heur haand rust op zien kop. Ze prat n beetje mit hom en din gooit Jurrie in ainmoal alles der oet.
Dit is tè mooi, dit kin nooit goud goan. k Bin ja n olle kerel as ik zo noar die kiek. Wicht, wicht, wat bist ja mooi. Bist ja net... jô, hou mou k dat zeggen, net n prinses dèr, n prinses en ik ben mor n olle knapzak. Wicht, wicht, wat bist begonnen.

Nou Jurrie, astoe der nait op aanduurst wil ik dat putje wel even opknappen, zegt Sambo en hai glundert over zien hail gezicht.
Doar kommen auto s al aan, zegt Elzo in ainmoal. Dij het aalvot oetkeken en hai het zok ook nait mishad, want t duurt mor even din stoan auto s veur deur!

Hou is t laiverd, bist hoast kloar? Sambo trekt ol taande aan schoetbaand, want ze mouten zò in auto.
Ast opholst mit dien proatjes is t goud, foetert t olske en aans wi k aal nait bie die in woagen. Magstie ja schoamen en dat magst, zo n ol minsk veur de gek te hollen.
t Olske dut schoet veur weg, trekt mandel aan en zunder noar Sambo oet of om te kieken lopt ze noar boeten.

Roulf Slagter holt deur veur heur open en niedeg schoft t olske achter in woagen.
Even loater let Sambo zok noast heur valen en doar zitten ze mit heur baaiden.
Hennie kikt nog even of alles in orde is en din keert ze zok noar Elzo.

Even gaait ze bie hom op raand van ber zitten en zaacht zegt ze: nou gaait t deur Elzo. k Wait zeker da k ter nooit spiet van krieg. k Zel goud veur joe wezen, òòk veur die mien jong.
En din gebeurt ter n wonder. Kaalm bocht Hennie zok veurover en geft Elzo n smok.
Elzo, dij de leste smok van zien moeke had het, blift ondanks dàt kaalm. Even holt e heur haand vast en zegt: Krigst n goie man wicht, en nou most votgoan!
t Leste komt ter kört oet, mor baaiden, Hennie en Jurrie, vuilen wat ter in hom omgaait. Din lopen ze noar boeten...

De nije Ford van Oarend Braauwer staait veur heur kloar en Oarend is der zulf bie. Mainstied gaait knecht mit, mor dit wol e zeker zulf doun.
Jurrie helpt Hennie bie t instappen (teminzen t hait: helpen!) en doar gaait t hin.
Stil zitten ze noast mekoar in de nije slee. Jurrie het Hennie in aarm pakt en aalgedureg knipt e heur even, net of e zeggen wil: nou gaait ter op aan!

Stoareg rieden ze deur t dörp. Toch is t te maarken dat luu der op wacht hemmen, want allerwegens stoan minsen bie mekoar te proaten.
Padij wuiven nog even, mor Jurrie kikt mor stief veur zok oet en Hennie kin minsen nog nait zo goud. Sambo vuilt zok as n keunink in achterste woagen. Hai zwaait noar elk en ain, net of hài noar börgmeester mout.
Taande het hom al n moal of wat woarschaauwd, want dij schoamt zok glad. As z alles waiten haar, was ze nooit mitgoan. Harregat, noast zo n vorrejeude, wel wait wat veur ongemak hai aan zok het.
Tòch, ze kin nait aans zeggen, hai zicht ter schier oet. Zien swaart pak is wel n beetje gruin bie steden, mor hai is in elk geval hail en schier.

Zo rieden ze deur t Wold. As ze Schewol achter zok hemmen begunt Jurrie toch wat meer te sloeken.
Hai gaait ais n moal verzitten, mor din krigt e n zeggen van Hennie, omreden ze baang is veur klaaier en nait te vergeten heur boeket.
As ze dicht bie Netoares zien hoes binnen brekt t benaauwd zwait Jurrie oet. Hennie het wel zo n beetje verteld hou e zok aanstellen mout bie börgmeester, mor doar is e t haalve al weer van vergeten.
Hai wil heur net wat vroagen as Oarend Braauwer voart mindert, omdat ze de leste bocht omgoan.
Jurrie kikt ais bie Oarend langs, laive tied wat ja n volk bie t gemaintehoes! Wel daarteg man as der nait meer binnen.
Oarend holt deur open en din mout Jurrie wel oetstappen, of e wil of nait.

Hai holt zok meroakel. Netjes helpt e Hennie bie t oetstappen, geft heur n aarm en tussen n riege dörpsgenoten en boetenstoanders deur lopen ze t Gemaintehoes in. Jurrie van Dam slot zien vrijgezellenleven of...

Wordt vervolgd!