Gerhard Tuinema.

Verhoal.

De Gebroeders van Dam (dail 12)

Vervolgverhoal, schreven deur Gerhard Tuinema.

Elzo is hailemoal van streek deur de bol van Knotnerus en zodounde is t hom al laank best dat Sambo mit hom gaait, alhouwel hai n grode hekel het aan dij vorrejeude.
Hai vlogt over loan en Sambo komt hoast oam te kört om hom bie te hollen. Wat is dat mit dij bol, stint Sambo onder t lopen deur.
Elzo blift even stoan en Sambo schrikt hoast as e hom aankikt, zó kwoad kikt dij tou kop oet.
Dij bol hè, begunt Elzo, is nou al n moal of wat lôsbroken en aiweg komt hai op ons laand terecht. n Hail stuk rog het e mie verpoasd, mor da s nait zo slim. Ons koien hè, da s veul minder. Aarme schepsels binnen kant van streek man. Mor k zel hom!
Mit zet Elzo zokken der weer in en Sambo mout, of e wil of nait, wel mit. Tong hangt hom hoast op schounen, zo muid is e. Kiek, doar hest hom, graauwt Elzo.

Doodkaalm staait bol heur mit zien lodderege ogen aan te kieken.
Is t n kwoaje, vragt Sambo. Dij knipt hom al n beetje. Hai mout niks van n bol hemmen en benoam nait van zo'n jonge. Is mainstied gain spier stoat op te moaken.
Zo, is Haijo weer n beetje aan t koiern?
Mit n ruk draait Elzo zok om en kikt in t gezicht van Knotnerus.
Ol boer kikt guteg over zien brilgloazen hin en sabbelt op zien krom piepke. Haijo aan t koiern...
Haijo aan t koiern, ropt Elzo. As joen bol zo hait mou k jô zeggen, mor hai koiert hier nait hail laank meer rond, dat wi k joe wel vertellen!
Nou, nou, kaalm aan mor Elzo. t Daaier dut gain mins kwoad.
Gain kwoad, gain kwoad? Elzo windt zok hou langer hou meer op. En mien rog din? Moije ais kieken hou e dat verpoasd het. t Is ja n schandoal man en dat is t. Mor dit zeg ik joe: as ik dij rötbol nog ainmoal op mien laand aantref, din gaait e d'r aan!
Nait zo deursloagen, nait zo deursloagen, Elzo. Doe mainst t nait zo slim. k Zel n dikke kouket kopen en hom doarmit vastzetten, din is t wel doan. En astoe schoade hest, zeg mor wa k die schuldeg bin, want Knotnerus het nog wel n beetje klaingeld nè? En ie zellen wel n beetje bruken kinnen, benoem as Jurrie straks traauwen gaait. Ha,ha,ha! Ol boer schudt van t lagen, omdat e t zo mooi zegd het.

W..w..w..w..àt zeg ie doar? Jurrie traauwen? Wel zegt dat! Man, stoa doar toch nait zo te kniezen. Ik vroag joe: wèl zègt dat bruier Jurrie traauwen gaait?
Sambo kaauwt rusteg op n grassprietje en hai knivvelt n beetje in zokzulf. Zò gaait goud. Dr mout n beetje leven in de braauwerij kommen. Wacht, t vuurtje n beetje oppoken!
Nou, ik leuf t vot ook nog nait, zegt Sambo, mor der wordt wel wat van proat. Wacht ais... was dat Jurrie zien aanstoande misschain dij bie joe in koamer zat?
Nou komt Elzo pas in t zin dat ter n vraauw in koamer zat dou e der mit veul gebeer binnenvlogen was.
Zo... zo... is t al zover? zegt Knotnerus. Dij olle guut hè, zit nog achter de vraauwluu tou. Wel... wel... wel! Dat kin n mooie bruloft worden. k Zai Jurrie nou al schoeven in zien traauwpak. Ha-ha-ha!

Man schai toch oet mit dat gelaag aal, ropt Elzo. En hol nou mor op mit joen getjaauwel, want k leuf der gain spier van, gain spier, heur je dat? Jurrie kikt wel oet. Man, hai is ja as de dood veur n bos rokken. Mor wa k zeggen wil, wol ie joen bol nou weghoalen of mout e mie de boudel nog meer verpoazen. En as k hom hier nog weer tref din gaait e d'r aan, wat ik joe brom. k Bin der nou flaauw van, stinflaauw ook. En joen klaingeld mag je wel hollen, k kin mie zunder joen centen ook wel redden.
Nou, as t zo ver is mit de traauwerij, din heur k wel hè? Knotnerus laagt nog ais even en hoalt din zien bol weer op. Wat het e n lol, dij olle boer.
Al n dag of drij is der proaterij van west dat Jurrie traauwplannen het. Hou t proatje aan loop kommen is, wel zel t zeggen.
Sambo kaauwt mor aal op zien grassprietje, mor dij wait ter wel meer van, dij deugenait.
Hou kommen minsen der bie hè, begunt Elzo noa n zetje weer. Jurrie traauwen, hest t ooit op vioul speulen heurd?

Jô kiek ais, zegt Sambo, ik leuf der ook gain spier van, mor as der proaterij van is, zel der ook wel n beetje van woar wezen. Hou ging dat mit Jansje Smit? Altied vrijgezel west en tòch kwam ze aan de man. En ik vroag mie of: wat mos dij vraauw doar bie Jurrie in koamer? En woarom haar Jurrie zien beste pak aan? Nou? Wel donder, vaalt Elzo oet, geliek hest, mor nou wi k ter meer van waiten. Elzo zet zokken der weer in en vlogt noar hoes.

Wordt vervolgd!