Gerhard Tuinema.

Verhoal.

De Gebroeders van Dam (dail 32)

Vervolgverhoal, schreven deur Gerhard Tuinema.

t Antwoord let nait laank op zok wachten, want as auto goud en wel stilstaait komt de doader om houk zetten. Hou vindt e t oet, dij vorrejeude. Want t is vanzulf Sambo weer.
Nou zai toch ais aan, hai het slipjas der bie aan en och laive tied nog aan tou. Hai het hoge zieden der bie op. Gruin van olderdom, mor t dut niks of, t is n hoge houd. Hai het n bos bloumen onder aarm. Gain klain boeketje, nee man, n haile vracht. Alles wat mor op n bloum leek het e bie mekoar zögd en zo staait e doar hail defteg te wachten.

En... och minsen wat n toustand, hoan het n grode strik om haals. Wel wait wat e nog meer omhaans had het, want as hai ainmoal aan de gaang is holt e nait weer op.
Elzo krigt ter benaauwd van. Hai kin hoast nait lagen, want din dut wond weer zo ofgemieterd zeer, mor hai mout wel!
t Is ook gain gezicht, eerlieks nait.

Roulf Slagter stapt op n duur mor oet, want as e zitten blift doun koaken hom net zo goud zeer.
Jurrie schoft ter aan aander kaant oet, óók al van streek.
En woar is de kroamvraauw, vragt Sambo as Jurrie veur hom staait. En eh... hou is t mit t potje? Alles goud hoop ik?

Mor din is t ook doan mit de flaauwe kul. Mit mekoar helpen ze Elzo in hoes.
Jurrie rekent mit Roulf of en Hennie zet kovviewoater over.
Sambo het vanzulf t hoogste woord. Wat dij wel nait beleefd het, doar binnen inden van weg.

Elzo zegt op n duur dat e zok stilhollen mout, want hai kin t nait langer volhollen.
Ze binnen goud en wel op streek as der roupen wordt van : Volk!
Achter mekoar kommen timmerman Mulder en vaarver Blaauw der inlopen om te heuren van hou of wat.
Dat komt mooi oet, omreden Hennie der ook bie is en dij het vanzulf ook nog wel t ain en t aander te zeggen mit t oog op t oetbesteden van de verbaauwerij.

Papieren kommen der bie op toavel en doar gaait hin. Sambo gooit ter asmis n zet tussen deur, mor verder gaait t hail kaalm tou.
Jurrie schrikt zok hoast n oap as e heurt wat hom alles zo ten roegsten kosten mout.
Donder Detje nog aan tou, dat is gain kataai. Doar is ja hoast gain biekommen aan.
Mor as e heurt hou t spultje worden zel ( Hennie doktert hom dat nuver veur ) bekikt e t toch aans.

Joa jong, zegt Sambo, doe most ook reken hollen mit dien kinder loater.
Jurrie is nait gaauw verlegen, mor nou schut hom kleur toch oet. Hai, da s ja gain proat geliek. Stel joe veur...
En wanneer kin je begunnen, vragt Jurrie, k wil t spul laist zo gaauw meugelk veur mekoar hemmen, want nou ja, ie begriepen mie wel.

Timmerman Mulder kin t ainlieks nait best bezetten, mor as Hennie hom even laif aankikt tapt e al gaauw oet n aander vatje.
Vaarver Blaauw wil ook nog wat zeggen. Mor as Hennie hom even over houk aankikt begunt e te stuttern.
Blaauw is nog vrijgezel en nou nait bepoald driest bie vraauwluu. Dat, hai kikt mor gaauw aander kaant oet en morrelt wat van: Aander week vrouw... ik bedoul... eh juvver... ik wol zeggen...

Net wat ie zeggen, zegt Sambo. Dij vaarvers kinnen der asmis zo dulek mit veur n dag kommen.
Nou, din eerst gegroet, zegt Blaauw. Hai wol ainlieks nog wel t ain en aander vroagd hemmen, mor t wordt hom nou toch te benaauwd.

Soavends lopt Jurrie mit doemen achter t vestje t spul ais bielaangs en as e n haalf uur loater zien Opoeoeoe... der weer oetdraait is der gain gelukkeger man op wereld. Want hai dreumt... Och nee, wat dut t ook of wat e dreumt.

Wordt vervolgd!