Gerhard Tuinema.

Verhoal.

De Gebroeders van Dam (dail 7)

Vervolgverhoal, schreven deur Gerhard Tuinema.

"Gelukkeg, dij 's weer vot!" zegt Jurrie en vrift zok t zwait mit buusdouk van kop of.
Hai het taande net noar bus brocht. Drij doagen is ze bleven en as ze heur zin kregen haar, was t nog laanger worden, omreden ze t best noar heur zin haar.
Mor jonges hemmen net zo laank aggewaaierd, dat ze op t lest toch mor oftrokken is.

"Ain is vot en aander komt ter weer aan", zegt Elzo en kikt tou t vinster oet.
Jurrie kikt ook ais en zicht dat Sambo t haim opfietst.
Bie de Börgelieke Stand staait e inschreven as: Henderikus Johannes de Lange, mor op t dörp kin men hom nait aans as Sambo.
Lelker kerel is der vast nait te vinden, mor n grotere kurendriever ook nait. Wat dij al nait oetspoukt het in zien leven stekt aal nait naauw. Hai lust aibels geern n klokje en k wil ook wel leuven dat e zo dag en deur zien pozzie ook wel krigt.

Zit gain spier kwoad in hom en der is ainlieks ook gain mins dij n hekel aan hom het. Toch mout men zok altied veur hom woaren, want as e t aits flikken kin hoalt e joe der deur. Zo is Sambo! Jô en wat e veur de kost dut zok ainlieks nait veur woar vertellen kinnen.
Hai is hounderkoopman, vorrejeude, schoapenscheerder, zwieneslachter en as t nait hoger of leger wil, is e der ook nog kwakzaalver bie.
Der wordt beweerd dat e hail wat minsen van n kwoal ofhulpen het, mor doar wil k nait veur instoan.
t Is zo: overaal woar wat te verdainen is, is Sambo te vinden, as e der mor nait muide bie wordt.

Elzo het nait veul mit hom op, mor Jurrie mag geern n zetje mit hom kwedeln.
"Is hier volk!" ropt Sambo mor mit dat e t zegt, staait e ook aal in koamer.
"Goidag joe baaiden, is t olle fregat de hoaven weer oetzaild?"
"Gelukkeg wel", zegt Jurrie. "Dat was n bezuiken jong! As vraauwlu op dij leeftied kommen is der gain hoes meer mit te hollen."
"Net zo", zegt Sambo. "k Kwam hier net langs en ik docht: k zel ais even kieken of der nog n stuver veur n aarme koopman te verdainen is. Hest nog vodden liggen Jurrie, of peerd'hoar? Old iezer kin k ook nog wel bruken, mor t kost nait veul tegenwoordeg. En as t wezen mout wi k die ook nog van remetiek ofhelpen. n Prima zaalfke jong, zo smui as botter."

Elzo is ondertied tou koamer oetlopen. Dij mout niks van Sambo zien getjaauwel hemmen. Dij is hom te glad en te filain, doar kin e toch lang nait tegen op.
"Vodden heb k nait en remetiek ook nait", zegt Jurrie. "Mor goa mor even zitten, hest t toch nait drok wel?"
"Och drok en drok..de zoak mout deurdraaien nè! Most mor zo reken, Jurrie jong, Mammon en ik hemmen ain mouder!"
Nou is t nog lang nait doan. As Sambo mit zien dure woorden begunt het t oard. t Roast naargens op, mor volgens Sambo is t zuver Letien. Dat mout e kinnen mit t oog op zien medecienen.

Wordt vervolgd!