Gerhard Tuinema.

Verhoal.

De Gebroeders van Dam (dail 46)

Vervolgverhoal, schreven deur Gerhard Tuinema.

Op bruloft komt gang der weer n beetje in. t Gaait eerst nog wel n beetje stroef noa dat geval mit Blaauw, mor Sambo zol Sambo nait wezen as e schot ter nait weer in kreeg. Hai trekt zien ol harmonnicô hoast oet mekoar en zingt as n liester.
Mor din het vrouw Mulder nog n stukje woar pandverbeuren bie te pas komt. Kin t nog mooier oetkommen? Sambo mout taande n doetje geven, mor doar komt niks van in.
Knotnerus zit te wippen op stoul, dat kin goud worden! Nee taande, zegt Hennie, eerlek is eerlek, doar kinnen ie nait of!
Of? Gain denken aan, zegt Sambo. Doar heb k nou aal oavend al op zitten te wachten. Gain flaauwe kul, dat doetje mou k hemmen.

En of ol taande nou hoog springt of leeg springt, ze aggewaaiern net zo laank mit mekoar tot ze bie Sambo op schoot zit. Dij het zok vanzulf nait aal te glad schoren en hai aait taande goud mit t gezicht om kin tou. t Ol mins reert t oet, mor t helpt heur allemoal niks.
En din, veur ze goud en wel in de goaten het wat ter gebeurt, bakt Sambo heur der n beste veur.
Harregat, doe jeneverhaals, doe vorrejeude!
Taande kokhaalst t hoast oet en as ter goud op aankomt is dat ook gain wonder. Mor wat dut t of. t Is mor ainmoal bruloft en din mout men nait zo naauw kieken.

Vrouw Blaik zörgt ondertied dat ze nait tekört kommen, al paast ze der nou wel veur op dat ain van aander kerels Blaauw nait achternoa gaait.
Eerst mor n harleke beet, onnaaiert zai noa t zeuvende klokje en din komt ze mit n schuddel vol worst.
t Is Sambo bepoald te dreug, want dij mout ter mit jenever deurspuilen. t Is toch compleet n wonder wat dij loeken en lasten kin.
Hai drinkt mor studdie deur en men kin nait zain dat e der aans van wordt. Allain wordt t speulen wat wilder en de laidjes dij e zingt binnen allemoal nait geschikt veur n jongedoameskostschoul.
Toch, wat kin e zien laidjes aans mooi noar veuren brengen. t Gaait hom allemoal gelieke smui of en al gaait e wel ais n moal over streep, hai holdt de moud ter mooi in.

Kees Maaier het nog nait veul zegd. Hai nipt aalgedureg even aan zien glaas, mor doar blift t ook bie. Gommes doagen Kees, zegt Sambo in ainmoal, wie hemmen die ja nog aal nait heurd. Hou wordt dat ol bui, doe hest mie t nog op handslag beloofd.
Jô kiek ais even, zegt Kees, tougelieks drinken dat gaait nog, mor tougelieks proaten kin nait en doe havvel hest dien mond ja aingoal veuraan, dat n aander kin mit goud fesoun ja nait aan t woord kommen. Mor as t wezen mout kin k joe nog wel n stukje vertellen. (vrij naar A.M. de Jong). Ik heb ais n bouk lezen en doar kwam n pervester in veur dij haar zok toulegd op t hazzens operaaiern. Kerel nog aan tou, wat was dij doar kloar in. Hai haar in oorlog west en zodounde haar e zo n kennis van zoaken. Dou komt ter op n dag man bie hom dij haar altied n vrezelke pien in de kop. Overaal was e al west, mor gain dokter kon hom helpen. Nou, dij pervester zol din wel ais kieken wat ter aan hoaperde. Hai holt hazzenspan der of, bekikt t spultje ais en zegt: dien hazzens binnen hartstikke voel, dat dij mou k hier wel n week of wat hollen om ze schoon te moaken.

Lokst zeker, zegt vrouw Mulder der tussen deur.
Wis en woarachteg nait, zegt Kees, t is woar gebeurd! Mor ik goa verder. Der was ofsproken, over n week of drij kon dij jong weerkommen, din was t spultje wel weer schoon. Afijn, dij pervester moakt dij hazzens net zo schoon as e ze mor kriegen kin en baargt ze din in n deuske op. Mor aal wel weer komt noa drij week, dij jong nait. t Duurt vaaier week, vief week en pervester wordt ter hoast verlegen mit.

Hai komt ais n moal tou t zaikenhoes oet en din lopt e dij jong zò tegen t lief.
Hee kerel, wostoe dien hazzens ook ais n moal weerhoalen? Ze liggen al n haile zet te wachten!
k Huif ze nait meer bruken, zegt man, k bin vorrekoopman worden!

Kloar is t. Ze hemmen vot deur dat dàt n streek veur Sambo is en dat gunnen ze hom net.
Sambo grolt zulf nog t haardste en zegt: Dat hest mooi zegd, Kees jong, doe magst nog ais weer aan t woord.
En zo hemmen ze n bult plezaaier mit mekoar. Jurrie zegt nait veul, dij het t veul te drok mit zien Hennie.

Hai nemt mor moateg in, mor zunder dat e der aarg in het krigt e toch nog n nuver klokje.
Gommes doagen nog aan tou, wat gaait hom t braid noar t zin en wat het e toch nuver wiefke.
t Is loat veur ze der om denken en as vrouw Koeper zegt: Movve ook ais noar hoes, is t haalf drij.
Sambo begunt te speulen: We gaan nog niet naar huis! Mor dat helpt hom nait veul.

t Wordt bergoanstied en bakker Mousker kin vot wel opblieven, want dij mout weer maank de stoetjes.
Mor hou mout dat nou mit de sloaperij, gooit taande der in ainmoal tussen deur.
Jô, dat is nait best, doar het nog gain mins over docht mit dij drokte.
Och, zegt Hennie, doar kivve straks beter over proaten, as aandern votbinnen.
Mor vanzulf, sloaperij mout nog regeld worden. Dat ze doar ook nait aan docht hemmen.
Ain noa aander gaait vot. Manluu lopen der almoal nait hail vast meer over, mor toch is der nait ain bie dij zok allain nait redden kin.

Wordt vervolgd!