Gerhard Tuinema.

Verhoal.

De Gebroeders van Dam (dail 29)

Vervolgverhoal, schreven deur Gerhard Tuinema.

Joa, dat wai k nait jong, zo goud heb k heur nait opnomen. Mor ast mie vragst, ik docht n leutje daarteg joar of even older misschien. Jonger in gain geval.
Zo, daarteg joar... n Flink vraauluu wicht, doar waist nait van. k Zag der eerst as de dood tegen aan as dij zusters mie wassen mozzen, mor as zai t dut vin k t aal zo slim nait. Ze is zo zaacht nè. k Wait aal nait hou t is...
Mor vertel mie ais gaait Hennie verder, wat scheelt ter ainlieks aan. Doe bist nait hail monter vandoag, prakkezaaierst wat aargens over? Vertel mie t din mor jong, ik bin nou ja gain vrumde meer veur die. Hest wènst van hoes? Tou mor, zeg t mor. Zò is t ook ja niks, foi kerel, kop nait hangen loaten. Nog n dag of wat en kist weer noar hoes goan.

Dat is t juust... och, wat dut t ook of, kin toch niks van kommen.
Woar kin niks van kommen, vragt Hennie verder. Tou toch jong, proat die ais oet. Doe hèst wat, dat heb k al wel laank schoten. Laagst mie nait oet as k die t vertel?
Die oetlagen? Kerel, hou komst ter bie! Doar kikst mie toch nait veur aan wel?
Nee, dat is ook zo... mor t is zo stoer wicht! k Mout mie ja schoamen en dat mou k. Kiek ais, dij swaarte zuster dij hier net langs kwam staait voak n zetje bie mie te proaten. Ze komt van t Knoal het ze mie verteld. Heur ollen binnen ook boer, n flinke ploats leuf k.
Ze is t hier ainlieks zat, mor ze het ook gain zin om weer thoes te kommen. z Is verloofd west, mor dij jong van heur het heur zitten loaten.
Om kört te goan, ze wil wel traauwen ducht mie. En nou Jurrie en doe t kloar hemmen haar ik docht dat ik... Nou ja, begripst mie wel. Wat ducht die wicht, zo k heur wel vroagen duren? Dit is nait vol te hollen. Dag en nacht heb k dat wicht bie de kop.
k Sloap ter s nachts nait van. Tou wicht, hou denkstoe der over...

Hennie mout alles eerst even verwaarken. Doar is de gört al goar, net wat ze docht het. Hou krigt ze hom der weer of, want dat t toch niks wordt het z al wel laank deur. Mor ze kin hom nait veur de kop steuten, din zol e nog daiper in put kommen. Wait zai der van Elzo hou of ter veurstaait bie die? Het ze misschien n beetje aanlaaiden geven?

Och, dat nait, mor z is altied hail oareg tegen mie. Mor nee, ze het naargens aanlaaiden tou geven. Mor k wol t zo geern wicht, din was ik straks nait zo allain as ie traauwd binnen.

Allain Elzo? Dat worst nooit en dat waist ook wel. k Zörg net zo goud veur die as veur Jurrie, doar huifst gain zörg over hemmen.
Jô, da s goud en best, mor s nachts en zowat hin bin k toch altied allain.
Nou, dat bist nou toch ook?
Jô, dat wel, mor e... nou ja, t dut ook niks aan de zoak of. Waist nait haalf hou n laive zuster dat t is.
Waist wat Elzo, ik zel ais mit dij zuster proaten, hou liekt die dat tou?
Nee!! Dat nooit, nee wicht, dat mou k zulf doun. Mor k duur nait recht. Hou dee Jurrie dat dou ie mekoar veur de eerste keer zaggen?

Dat dut niks aan de zoak of. Het gaait nou om die en nait om dien bruier. Zowat kinnen vraauluu onder mekoar beter regeln. As ik wait van hou of wat din kist doe ja verder wel mit heur proaten. Wacht mor, loat dat mor aan mie over.
Nou, tou din mor... hai, wat is t ook ja n boudel.

As de zuster even loater weerom komt holt Hennie heur even stoande en lopt din mit heur tou deur oet. Elzo duurt aal nait opkieken, zò schoamt e zok.
Hou zol dat ofkaalven? Kerel, kerel, wat is t ook n mooi zwaart zustertje. Stel joe veur... zoain dag en nacht om joe tou... om joe te schoedeln... dèr!

Even loater komt Hennie weerom. Ze het heur plicht doan en goud doan ook. Aan heur gezicht kin Elzo al wel zain hou of ter biestaait. Verloren!
t Muit mie jong. k Heb doan wa k kon, mor t mog nait zo wezen. Mor doe bist ook n mooie. Vertelst mie dat ze nait verloofd meer is en zai vertelde mie net dat t al laank weer veur mekoar is. Mor t is mor goud ook jong, want t is n wicht van niks, dat heb ik al wel vernomen. Zet die doar mor gaauw overhin, da s t beste wast doun kist. En dij zuster krigst nait weer te zain, dij gaait noar n aandere ofdailen. Elzo let zok versloagen nog daiper in t kuzzen wagzakken. Hai kin t ja nait leuven, mor Hennie zegt t ja en dij logt nait...

Nooit zel Hennie de Boer vertellen wat ze mit dij zuster besproken het. Al hèt ze tegen hom ook n beetje logen, t was veur hom in elk geval t beste zo. Zo n zuster ook, wat haar z hom mooi opdraaid... Mor zo gaait t as olle jonges op vrijersvouten kommen.

Wordt vervolgd!