Gerhard Tuinema.

Verhoal.

De Gebroeders van Dam (dail 38)

Vervolgverhoal, schreven deur Gerhard Tuinema.

Doar is ain bie t glaas, zegt vrouw Joager as Jurrie veur de daarde moal aan t sloapkoamerglaas tikt het.
Eh... wat? Boer Joager slept nog haalf as zien vraauw t zulfde nog ais weer zegt.
Ain bie t glaas? Jô, nou heur k t ook. k Zel wel even kieken wat ter loos is.
In n roets is boer Joager tou ber oet. Hai schut gaauw n boksem aan, gript jaas van stoul of en gaait noar t glaas.
Wel is doar?
Van Dam, Jurrie van Dam! Zol ie wel even bie bruier kommen willen?

Wacht, ik kom wel bie deur, zegt Joager en even loater schoft e grondel van deur of.
Gommes van Dam, kommen ie doar midden in nacht aanzetten? Wat is der wel te doun?
Bruier Elzo komt om van pien. Hai s de haile nacht al in t in west en hai wil gain dokter hemmen. Hai s net oet t zaikenhoes kommen en nou is e veuls te baang dat e weer onder t mes mout. Nou hemmen wie heurd oet goie bron dat ie hail kloar wezen mouten bie zokswat en doarom wo k joe vroagen of ie votdoalek mitgoan willen, want bruier kin t nait langer oethollen.

Ja, t is n male tied, midden in nacht, mor wait je wat, k goa vot mit. k Zel mie even aanklaiden. Kom ter mor even in zo laank. t Is onder dak beter as boeten. Kerel, wat trekt t nog fien, nè? Zel wel vorst achter zitten ducht mie.
Vief menuten loater het Joager zok aanboid en din rieden ze mit heur baaiden deur t sloapend dörp.
Asmis zeggen ze n woord of wat, mor ze hemmen ainlieks nait veul zin om te proaten.

Taande wacht heur al bie deur op. k Bin bliede dat je der binnen, zegt t ol. Pien is wel wat ofzakt, mor t is nog lang nait in orde. Zo, din binnen ie dij wonderdokter? Mor eh... ie doun jong toch nait zeer nè? Stumper het al zo n pien!
Elzo veert op as Joager veur t ber staait. Wat bin k bliede man dat je der binnen.
t Vaalt nait tou, aalvot pien. k Heb de haile nacht al liggen te ruden.

Zo, zegt Joager, nou zevve ais kieken of ik kontakt kriegen kin. Blief mor rusteg liggen van Dam, dat is t beste.
Joager legt zien haand op Elzo zien haartstreek, gaait verder omdeel noar knij, rust doar even en gaait din weer omhoog. Ja, nou vuil k al wat! k Heb kontakt! Zòòò... Nou zel pien wel gaauw ofzakken.

Der gebeurt ainlieks niks en toch gebeurt ter ook weer n hail bult. Der ligt n glans op Joager zien gezicht, net of e in n aandere wereld leeft. Hai zegt niks, mor zien handen lieken aans as aans.
t Is krekt of der wat in hom is dat bie ons soort minsen ontbrekt of slept. Taande, Jurrie, Elzo, ale drij blieven doodstil ondertied dat Joager zien waark dut. En toch... der gebeurt wat!

Elzo zien gezicht krigt n aandere oetkiek. t Is net of hom der n last ofhoald is. Stil ligt e in t kuzzen... Langzoam trekt pien vot... t Is of t n aiweghaid duurd het as Joager weer overind gaait. Man het t zwait veur de kop stoan, mor toch kikt e bliede oet.
Ziezo van Dam, nou is pien wel vot nè ? Goa nou mor gaauw sloapen en as t weer slimmer wordt van week kom k nog wel ais weer.
Holt joe mor rusteg in de waarmte. t Leste heurt Elzo al nait meer, want hai is zo in sloap valen.
Op tonen lopen Jurrie en Joager noar deur en taande kropt weer onder t veren ber.

En wat ben k joe schuldeg, vragt Jurrie bie deur. Dat kinnen wie loater wel moaken van Dam, want k bin baang da k hier nog ais weer kommen mout.
Zol t remetiek wezen, vragt Jurrie.
Kiek ais van Dam, ik bin gain dokter mor as je mie vroagen din zo k zeggen van nait. t Liekt mie nait best tou, mor ik kin t ook wel mis hemmen. t Kin best wezen dat pien eerst weer n week of wat votblift, mor dat t weerkomt, doarvan bin k overtuugd. Mor komaan, k zel zörgen da k weer thoeskom. Mörn is t weer vroug dag. Din eerst welterusten!
Nou, din wôje eerst bedankt en wel thoes!

n Zetje loater ligt Jurrie weer achter bedsteedeuren, mor hai kin vot nait weer in sloap kommen. Joager het nait zegt wat zien gedachten wazzen mit t oog op Elzo zien kwoal, mor toch vuilt e wel dat t slimmer is as ze denken. Hai het zien gedachten der ook over goan loaten, mor hai wil der nait noar tou...
Dij kwoal kin t nait wezen, dat zol ja vrezelk wezen. Mor toch...

Jurrie, bist nog wakker?
Jurrie is doalek tou ber oet as Elzo hom ropt.
Wat nou bruier, hest weer pien?
Nee Jurrie, mor k mout even mit die proaten. Goa ais even bie mie zitten.
Kiek ais bruier, dou ik zee dat t wel remetiek wezen kon, wis k zulf wel dat t nait zo was. k Heb al voaker pien had, mor nooit zo slim.
Jurrie, k bin baang dat t kanker is. In t zaikenhoes deden ze ook al zo vremd, zo gehaimzinneg. Misschien kom k wel weer van ber of, wel zel t zeggen. Doarom Jurrie wo k geern dast mie nog n plezaaier doun wost. Doe en Hennie goan twij n twintegsten traauwen. Nou ik zaik ben hollen ie misschien gain bruloft en toch Jurrie, dat môje wel doun. k Wol zo groag mitmoaken. k Bin toch zo bliede jong dastoe Hennie krigst. Zai kin mie aan t inde brengen en as ik vot bin vuuilstoe dat nait zo slim. Nee Jurrie, loat mie nou even oetproaten. Ik wait dat ie al t ain en t aander regeld hemmen. Loat alles zo as t is! Dou net of ik zond ben, dat heb k t laiste. t Is misschien t leste wast veur mie doun kist. Wie hemmen ja roemte zat en doarom kinnen wie hier genog mit mekoar wezen. Prakkezaaier der mor ais over jong. Welterusten!

Stil gaait Jurrie weer op ber en as e der goud en wel ligt schraift e as n kind. Wat hai docht het, het Elzo zegd! Dus toch...

Wordt vervolgd!