|
Week 0144
Mobieltjes.
Hejje t ook lezen lu?
Mobiele telefoons brengen hail wat tewege in n mìnsenleven. Ie waiten vervast wel al, dat ter paardie lu binnen dij leuven dat de zendmasten veur de mobiele telefonie alerhande stroalens uutzenden, woar je zaik van worden kinnen, as je der in de buurt wonen.
Boetendes is der in Amerikoa onderzuik doan noar mìnsen dij rond heur oren kankergezwellen hebben. Dat schient din t oor te wezen, woar ze heur mobieltje tegen aan holden as ze bellen. t Gaait zulfs zo ver dat ter geleerden binnen dij beweren dat joen hazzencellen zo'n beetje kookt worden as je teveul en te laank achtermekoar bellen.
Och, wat n boudel nait? En nou zai ik ook nog op televizie dat der n bulde lu binnen mit TWIJ van dij proatdeusies, omreden zai n dubbelleven laaiden. As klap op de vuurpiele lees ik dat mobiele telefoons t seksleven van jongern stimuleren. Kiek, dat zet joe aan t dinken, hè? Zollen ze aalmoal 0-9 nummers bellen? Of zollen ze n telefoon hebben mit trilfunctie, meschain? Nee, dat is t nait. Zai bruken dat ding om intieme gesprekken te voeren.
En zai huiven nou nait meer mit t schoamrood op de koaken n oardeg wichtje vroagen of zai n ofsproakje mit heur wil, nee, dat doun zai mit tekstberichten op heur buutsmobieltje.
Geweldeg nait? Ik kin ze van dichtbie, van dij 'nije'vrijgezellen, de oldere jongern zeg mor, van bienoa viefteg dij mit heur telefoon onder toavel in de weer binnen om tekstberichten aan heur nijste scharreltjes te sturen.
Doun ze dat onder dij toavel om t gehaim te holden, dochten ie? Nee man, ze binnen te aigenklouk om tou te geven dat ze n leesbrille neudeg binnen, want ze loaten wel mit n vedde lach de binnenkommende berichten lezen aan heur gezelschop. Zokswat is ook zo goud veur joen sosjoale voardegheden, zol ik zeggen!
En din kin je ook nog zunder woorden en zunder berichtjes 'kommeniseren' mit joen telefoontje.
Wozzen ie dat manlu, dij heur dure mobieltje opzichteg aan de boksemraime droagen, zeg mor n beetje veur t kruus, dat dij doar bepoalde signoalen mit ofgeven? Dat is nait stoer te begriepen wat zai doar mit willen, vanzulf. Doar hebben wie gain waitenschoppers veur neudeg.
Vraauwlu dij heur telefoon dudelk zichtboar bie zuch hebben, willen aandern juust op ofstand holden, zo zegt t onderzuik. Zai willen doarmit zeggen dat ze nait beschikboar binnen. Zai binnen nait alinneg, zai hebben heur telefoon!
Wat mot ik in dat geval dinken van n hoesie van Winnie the Poo, dij k in t postketoor liggen zag?
Op de foto van t pakje stonden allinneg mor vraauwlu, dij mit n braide lach om de lippen mit hoesie en aal aan t telefoneren wazzen.
Zol dat wezen: ofstand holden? Of zol dat wezen: ik bin op zuik noar mien aigen dikke knuvvelbere?
Nou, ik wos wel wat ik dee as aine mie uutvruig via n bericht op mien mobieltje. Aine dij nait mans genog was om mie dat liek in mien gezichte te vroagen, zeg mor.
Ik zol weeromme berichten (toetsen ie even mit?) : 3-666-33 666-3-3-33!
|
