Geesjen Doddema-Heidema.

Hejje t ook lezen lu? t Was ofgelopen weekend weer moederdag. As ik de aine folder leuven mag, is moeke slim bliede mit n boske plestieken tulpen, terwiel d'aandere ons wiesmoaken wil dat zai op zien minst n wasdreuger hebben mot, of n golden ringe mit diamanten.
Ik kin ook vraauwlu dij roupen: "t Huift van mie nait hor! Aal dat kommersjele gedou, dat is allinneg mor goud veur de middenstand."
Mor zai binnen aangenoam verrast, as ze toch n ditje of datje kriegen.
Ach joa, Sunterkloas, voaderdag, daaierndag, sikteressedag, t kost joe aal dik geld. Want zulfs as je mor n gehoakde pannelabbe geven willen, mouje toch eerst noar de handwaarkzoak om n klountje goaren te kopen.

Nee, din in Brazilië in t ploatsje Esperantina, doar hebben ze wat bedocht woar gain winkelier wat aan het. Zai hebben nou veur t twijde joar de dag van t orgasme vierd. Joa, ie lezen t goud. n Hoogtepunt-dag zel ik mor zeggen. t Is n ploatske mit 34.000 inwoners, dus zo'n uutgebraaid winkelaanbod zel der nait wezen. Gain winkelier, dij zien negootsie der haarder om kwiet roakt, ducht mie. De gemainteroad het dizze dag insteld om n serieuze diskussie lös te moaken over dit onderwaarp. De roadsleden vonden t wel neudeg om nog even te onderstrepen, dat zai zulf niks te kloagen hebben, mor veur Juan mit de Sombrero schient t toch nog nait mit te valen. Of veur Juanita kin ik beter zeggen, omreden veuraal de vraauwlu klachten hebben.

Mor laifst 73 persint van alle vraauwlu uut Esperantina binnen nait tevree over heur seksleven. Wat hait, seksleven, t schient zo slim te wezen dat t meer dood ketoen is. En doar kommen dikke sosioale perblemen van, zo as roezies, echtelk bedrog en schaaidens. Wat doun ze nou op zo'n dag, zol je dinken. Nou, de inwoners konden n lezen biewonen van de beroemdste prostituee uut t dörp. Zai het 47 joar in t vak zeten en het intied de respektoabele leeftied van 63 joar beriekt. En zai het uutlegd, wat dij roem 5.000 mannen dij bie heur klant binnen, zo aal veur winsen hebben.

De pastoor van t dörp het niks tegen de feestdag. Nee, zel wel nait. Scheelt hom meschain weer wat huusbezuik. De börgemeester schoamt zuch dood, dat der zo'n dag in zien gemainte is. Hai vindt de bewoners veul te open. Dat soort dingen mout je achter gesloten bedsteedeuren holden, vindt hai. Veuls te veul opwinden zukswat.

Ach, volgens mie vaalt dat wel mit. Ik wait nait hou t mit joe is, mor n lezen, doar kin ik nait hait of kold van worden, loat stoan dat ik mie doarover opwinden zel.