Geesjen Doddema-Heidema.

Hejje t ook lezen lu?
Suntnikloas is weer veurbie. Wie schienen mit zien allen minder uutgeven te hebben as veureg joar, want ja, tieden worden minder hè? Nou, ik kin joe wel vertellen dat ik dit joar tot op de sint gelieke veul uutgeven heb as veureg joar, niks noamelk. Kiek en zo zellen der wel meer wezen. Mor ja, dij lu hebben ze weer nait vroagd vanzulf.

Mor nou wordt t aans hor. Ie waiten ja wel, dat ik gek bin op onderzuiken. En iederbod roup ik bie de uutsloagen van t ain t of aander: "Mie hebben ze weer niks vroagd vanzulf." En nou is t zo wied. Soamen mit nog n poar aandere huusholdens binnen wie aanschreven deur t Centroal Bureau veur de Stoatestiek of wie mitdoun willen aan t onderzuik. Nou? Wat zeg je mie doar nou van? Indelk vroagen ze mie nou wel ais. t Is gain slim opzainboarend onderwaarp. Wie mouten n joar laank n huusholdboukje bieholden van aal onze uutgoaven. Dus, as der volgend joar bekind wordt, dat t deursnee Nederlandse huusholden meer geld uutgeven het aan veurgesneden mous en vastkokende eerappels as aan wasmesienen en dure auto's din komt dat mit deur mie!

Ik von t eerst mor niks. Ik ruip votdoadelk dat ik doar nait aan mitdoun wol, mor noadat ze joe de braif stuurd hebben, bellen ze joe ook nog op. t Was n hail vrundelke juvver, dij ik aan telefoon haar. t Was nait slim veul waark volgens heur en ingewikkeld was t al hailendaal nait. En veur in de vekansie kreeg je n apaart huusholdboukje. Mouve mor hopen, dat we n groot vekansiebouk kriegen, omreden wie ja zes weke vrij hebben en din n bulde geld uutgeven kinnen. En as wie mitdoun wollen, haar ze direkt n poar vroagen. Nou, doar bin ik veur sloagd, hor. Ik kon alles zo tot de kop uut beantwoorden. Nee, gain stoere boudel dus.

Mor din komt t. Hejje ainmoal touzegd, krieg je weer n braif. Dat der n mitwaarker kontakt mit joe opnemen zel veur nog wat meer informoatsie. En wat ston der in dij braif? De goie man komt om joe de vroagenlieste en de waarken van t huusholdboukje uut te leggen. En t zol ja nait ingewikkeld wezen. Zollen ze dat nou zegd hebben om joen toustemmen te kriegen, of zellen ze verwachten dat t gemiddelde IQ van de uutverkoren börgerman of -vraauw nog leger is as heur schoumoat? Dat zal mie nou ais nijdoun. Ik hol joe der van op de högte.

Ach ja, mörgen komt de goie man. Hai wait t nog nait, mor zien noam is persies t zulfde as van mien gebraaien moes, dij ik as lutje beudel mit noar berre nam. Ik kin miezulf, ik wait zeker dat ik doar mörgen aal aan dinken mout, as de man tegenover mie zit. Nou mor hopen, dat e nait van dij grode gele knopen en hupselen aan de boksem het.