|
Week 0346
Huusdaaier.
Hejje t ook lezen lu?
Wie Nederlanders binnen gain haile besten. As je t nog nait wozzen, heb je nou ook heuren kind van n aander. Want tot mien grode schrik las ik van de weke dat de Austroalische regeren n negatief raaisadvies ofgeven het veur ons laand. Stel joe even veur. Ik haar aaltied t idee dat zo'n moatregel nomen wuir as der sproake was van oorlog, oorlogsdraaigen, of n netuurramp. Mor dat hevve hier in Nederland toch nait haar ik zo docht. t Bliekt dat de zakkenrollers en tazzenrovers in Amsterdam de boetenlandse toeristen zo regelmoateg te groazen nemen, dat ze zulfs aan de aandere kaande van de wereld al woarschaauwen veur dat getaisem. En din te bedinken dat zoksoort lu hier zomor lös rondlopen.
Lös rondlopen is traauwens ook nait van gevoar ontbloot. Neem nou dij kadde dij van de weke trovven is deur vaar schot hoagel. Ainmoal kin meschain nog touvaal wezen, mor vaar moal schaiten op zo'n daaier dat is toch te gek. Is dat n joager west, dij neudeg zien ogen testen loaten mot, of ain of aandere haalfmale dij veur de lol n beetje mit n geweer aan loop is? t Schient veur t daaier nog redelk of te lopen, in elks geval leeft e nog. n Woordvoerder van de joagersverainen vind t nog pienlek ook, joa, dat dankt joe de koekoek. t Mainst pienlek is t vanzulf veur dij aarme kadde. Mor volgens lu dij t waiten kinnen, heuren katten ook nait in t veld. Din worden ze aanzain veur verwildere eksemploaren en dat binnen echte rovers, dij vreten aal dij aarme vogeltjes op, dij aans deur de "echte" joagers doodschoten worden, en dat kin nait vanzulf. Katten motten gewoon in heur aigen toene blieven of aans mor aan n lientje lopen. Letterlek huusdaaier motten t worden.
Doar wordt traauwens ook poal en paark aan steld. Der schient in Nederland n "Raad voor Dierenaangelegenheden" te wezen. En dij road het der joaren over doan, om n lieste soamen te stellen van daaier dij wel en nait meer in huus holden worden maggen. Oapen bievubbeld worden ten strengste verboden. Nou heb ik mien oabe aaltied in tazze, mor dat is din wel aine van t soort dij toustoan is. Bie t opstellen van de lieste moggen de daaierbeschaarmen en stichten AAP ook mitdenken. Ze wazzen dus wel bie t overleg betrokken, mor tevree over de induutslag binnen ze nait. Swieniegels, kemelen, flamingo's en iesvogeltjes maggen aalmoal nog as huusdaaier holden worden deur d'eerste de beste kemeeldriever dij zuch dat in de kop hoalt. Doar wor je toch ook hailendal nait bliede van?
Nee, ze zeggen wel ais, zoveul te beter as ik minsen kennen leer, zoveul te meer hol ik van mien hond. En zo is t mor net.
|
