Geesjen Doddema-Heidema.

Hejje t ook lezen lu?
Alerhaande berichten over daaier, mooi en maal. Wat te dinken van t bericht dat n kikker n soort van rodeo-rondvoart moakt het op de rugge van n koikarper. As je t aal leuven maggen zag n Frais n grode gruine kikker deur zien toene springen en op de rugge van ain van zien vizzen springen. t Schient dat de kikker nait aal te intelligent was, omreden hai zien poten veur d'ogen van de karper huil, woardeur dij weer niks zain kon en wel vief menuten laank mit de kikker op de rugge rondjes deur de viever muik en doarbie ook nog verschaaiden moal tegen de raande opknalde. De Frais het t ook nog aal vastlegd op video. k Wait nait hou of t joe vergaait, mor ik zol wel eerst ais dat filmke zain willen, veurdat ik dat leuf.

En hebben ie n wotternust? Kin je nou n vleske kopen mit 8 miljard bakteriën derin. (Dat binnen achtdoezend-miljoun, hor!) As je dij lösloaten in joen berre, blift t wotter lekker vris. Nou haar je der ook al n stuk of wat baisten inzitten, de zogenoamde gram-negatievelingen en as dij heur gang goan kinnen, din begunt joen berre te klotsen. As je nou zo'n vleske vrundelke daaiertjes derin mikken, komt t aal goud. Mag ik joe doar nog n tip bie geven? As ik joe was, zol ik soavends de wekkerradio nait meer aanzetten. Stel joe veur dat der n vrolek meziekje op komt en dat dij 8 miljard bakteriën n polenaise doun goan in joen wotternust, krieg je ja gain oge meer dicht.

Woar ik d'ogen bie uutvrieven mos, was t bericht dat t in t vervolg nait meer neudeg is dat runder massoal ofmoakt worden as der weer ais n uutbroak komt van MKZ. Der mag nou van te veuren inent worden om te veurkommen dat de daaier zaik worden. Doarnoa binnen ze wel veur t leven taikend vanzulf, staarker nog, zulfs noa heur dood. As ze slacht binnen krigt t vlees n grode stempel, en maggen allinneg Europeoanen dat nog eten. Nou, doar binnen ze ook op tied achter kommen, nait? De wereld van dij koien binnen, sommegen zulfs mit trappelnde kaalver in t lief, ofmoakt en op n biezunder daaieronwoardege menaaier mit griepers in vrachtwoagens donderd. En nou opains huft dat nait meer. Aal dij boeren dij heur haile veestoapel vannijs opbaauwen mouten hebben der in elks geval niks meer aan, om nog mor te zwiegen van dij daaier zulf, dij veur niks t houkje om holpen binnen. Nou binnen heur veuruutzichten zowiezo nait aal te rooskleureg, mor dat is weer aans wat.

Bie t bestrieden van de vogelpest hebben ze nog gain last van veurtschriedend inzicht. Doar waiten ze allinneg nog mor van doodmoaken. Zuster Maria van t klooster in Heusden kon dat nait aanzain en het n poar hounder onderdoeken loaten. De Algemaine Inspektiedainst is doar slim kwoad over worden en nou zit dij moeke overste vast op t plietsieburo, woar ze zomor celruumte haren. Aal dij gevoarleke boeven lopen zo mor lös rond, omreden doar gain stee veur is, mor veur zo'n nonnechie hebben ze nog wel n hokje over! Zo zai je mor, t is ongeliek verdaild in de wereld. Nou heb ik wel ais begrepen dat de sloapkoamertjes in t klooster ook sloapcel nuimd worden, dus veur zuster Maria is t meschain nait zo'n vrezelke stravve.

Mor evengoud. Soms vroag je joe of, woar de overhaid mit bezeg is. Volgens mie is dat n kwestie van cellentekört. Hazzencellen din vanzulf.