Geesjen Doddema-Heidema.

Kerst wordt aal Amerikoanser en din veuraal mit meer kitsch, schreven ze van de weke in d'kraande. Volgens de woordvoerder van t aine woarenhuus ligt veuraal n golden kunstboom goud in de maarkt. n Aander beweert dat wie kaizen mouten tussen sobere widde dekeroatsies of uutbundege zigeunerkitsch mit fel gekleurde laampkes en engeltjes. Bie weer n aander vlaigen de verlichte plestieken kerstmannen en snijpoppen de deure uut.

As ik zowat bie t pad zai, krieg ik akuut n aanval van ploatsvervangende schoamte. Woar is de goie smoak bleven, vroag ik joe. Haalf november zag ik in n veur de rest toch oardeg schiere buurt al n arreslee mit rundaaier van lampkes bie aine in t toene stoan. Ie waiten wel, zo'n vertuut dij vrouger allinneg bie de krudenier om de houke op t dak vastsjord ston. En wat te zeggen van dij lu dij in heur toene n poar dukdalven mit maiwen derop stoan hebben en dij mit Kerst n rood puntmutske opdoan hebben. Of dij grode stainen Rottweiler mit n verlichte kerstmutse op.

Niks is ook ja te gek tegenwoordeg. Veur proatende of zingende kunstkerstbomen draaien lu d'haand nait meer om. Jinglebells pingelnde deurmatten verwelkommen de gasten en in de koamer staait n zingende kerstboom.

Haren ie en ik joaren genog aan keerzen mit ain lont, inains mozzen der meer aan zitten. En wil je keerzen mit zebra- of loie-peerdenmotieven: ook dij binnen te koop. Staarker nog: ik heb aargens lezen dat haile dunne keerzen dit joar hailemoal trend wezen zollen. Nou din mag ik wel eerst ais weer nije keerzenstandoards kopen.

En haren ie veureg joar mit veul zörg en geduld nije kerstbalen uutzöcht din kin je nou wel weer hin goan. Dit joar mot t aal lila of donkerbroen wezen. Zilver en rood is echt uut hor. Wil je hailemoal trendy wezen din mout je minstens proatende elandskoppen aan de mure hebben en kerstbomen aan t plafond. En aans wel n zingende en swingende kerstman mit hupzelen of n snijvlokjesmesien. Ie kinnen van t joar zulfs al n hail poppenkoor kopen, dij tougelieks zingen kinnen, mor ook in kanon! En din hebben we t allinneg nog mor over wat je in huus hebben kinnen.

Boeten wordt t ook aal gekker. Haren vrouger allain de notabelen van t dörp n verlichte boom in toene, nou telt dat hailemoal nait meer mit. Der mout nou toch op zien minst n kerstman of zo'n arreslee mit rundaaier mit n uut zien krachten gruide kebouter achterop van lichies in joen toene stoan. t Laifst nog drij-dimensionoal. En hebben joen buren heur gewone toenverlichten ook al vervangen deur plestieken kerstmannechies? En joa, netuurlek, n poar meter lichtslange mout je toch ook wel langs de dakgeuten foeveld hebben om mit te tellen.

Nou ja, lu. Ie mouten mor doun wat je nait loaten kinnen hor. Vrede op oarde ja. Elk zien aigen. Ik persoonlek, ik begun nait aan dij moderne fratsen. Ik hol t ainvoudeg zoas ale joaren. Mien kerstboomke staait elf en haalve moand van t joar in n plestieken pude op zolder, mit balen, slingers en lampkes derin. Ik huif hom allinneg mor even pakken, hinzetten, stekker derin en kloar ist.

Mor ik wins joe aalmoal veul staarkte bie t versieren van joen huus en toene.