Geesjen Doddema-Heidema.

Hejje t ook lezen lu? Of meschain kin ik in dit geval beter zeggen: Hejje t ook zain? Wie hebben van de weke kieken kind noar de Nationoale IQ-test. Nou dat was mie wat. Doar wuir ik veur n dilemmoa steld, vanzulf. Aargens wol ik toch wel geern waiten of mien intelligentie n beetje boven t gemiddelde uutstekt. Mor ik haar zain dat der op n aandere zender n spannende film draaid wuir en dij wol ik toch aigenlieks ook nait missen. k Heb toch mor veur de film kozen en zo kon ik noatied nog net overschoakeln om de oplözzens van de test en de uutslag te bekieken. En ik heb in n ketaaier wel weer genog zain, hor.

Dij presentator-vogel, ie waiten wel dij man dij der aaltied en aiweg uutzugt of e n kroezege kopstubber op kop het, haar n redelk schier pak aan. Mor dou e hailemoal in beeld kwam zag ik dat e zien trimschounen vergeten haar uut te doun. t Was werkelk gain gezicht. En din was der nog zo'n blonde juffrouw bie. n Kolbertje aan dij dichtknupt was net beneden heur blode borsten. Ie huilen joe t haart vaste as zai zuch over t pebliek boog om zo hier en doar n daipgoande intelligente vroage te stellen. Zo was der n vak mit overwegend manlu woar op de veurste riege n vraauw zat. En dij mos din antwoorden op de vroage hou dat nou was om tussen aal dij manlu te zitten.

De moakers van t pergram haren dudelk heur best doan om n dwaarsdeursnee van de bevolken as publiek anneks dailnemers op te trommeln. De veuroordailen dropen van t schaarm of. Zo haren ze n bak vol allochtonen, n bak vol boeren, n bak vol blondjes, n bak vol belgen en n bak vol studenten. Woarlek n internationoal gezelschap veur n nationoale test. En din zaten doar, mit hail wat meer aarm- en bainruumte, nog n steltje bekinde nederlanders op t teneel dij ook mit aan deden. t Zel wel aan mie legen hebben, mor ik kon de helfte der nait van. Mor ja, dou d'uutslag, hè? t Bleek dat van t gewone volk de domme blondjes nait t domst waren. En aine uutschelden veur domme boer kin in de toukomst ook nait meer. Want de boerenbak haar gemiddeld t hoogst skoord. En t alderknapste jonkje van de klazze was vanzulf n Belg. Mor aal dij dailnemers wazzen goud instrueerd. Zai haren oefend, dat kon je zo wel zain. "Wat der ook gebeurd, ie mouten goud ontholden dajje in de eerste ploatse klapvee binnen", zellen ze wel zegd hebben doar. t Slechtste vak ruip din ook om t haardst hoera veur zuchzulf.

En din dij bekinde nederlanders. Der zat n bokser bie dij t leegste IQ scoord haar. Zol e docht hebben dat e aan wedstriedje boksen mitdee? Verstand op nul en deurmeppen? Gelokkeg was der n perfesser bie dij t aalmoal nog ais uutlegde. n Hoge skore was mooi, zee dij. Mor t was hailemoal nait zo slim as je wat minder punten haren. En dat zeggen ze din noa ofloop pas, vanzulf.

Hou serieus mout je zokswat nou nemen? Ach, ik zeg mor zo, ie huiven nait ales te waiten. As je mor waiten woar je t opzuiken mouten. En aans wacht je gewoon tot je wat older binnen. Ik zag noamelk dat as je boven de vatteg wazzen, dat je din veur minder punten meer IQ touwezen kregen. Dat was omdat je noa joen viefendattegste al wat oftoakeln. Hou dat mit heur volgende test goan mout wait ik nait. Ie holden joen haart vast, as je bedinken wat veur pebliek der din komt. Ik reken: n bakvol prostituees, n bak vol vrijgezellen, n bak vol kiekers, n bak vol potloodventers, n bak vol SM-meesters en juvvers en n bak vol hoerekaastboazen. O, ik haar joe nog nait verteld wat dij volgende test is: nou hol joe vast, de Nationoale Sex-test!