Geesjen Doddema-Heidema.

Hejje t ook lezen lu?
Der was genog nijs ditmoal. Mooie berichten en male berichten. Och en wat veur de ain mooi is kin veur de aander ja wel maal wezen. Zo las ik twij berichten van iedeljipske manlu, dij n pertret van zuchzulf schildern loaten haren en der vervolgens nait tevree over wazzen. n Old- hoogleroar luit zuch schildern om noa zien pensioun in de pertretten galerij noast ale aandere old-hoogleroaren te hangen. Noa drok overleg ging schilderes der mit aan loop. Noa n week of wat was t kloar, de lieste mog der om en dou bleef t stil. Wat bleek bie noavroag: Perfester was nait tevree over t schilderij, zo wol e nait noast zien kollegoas hangen. Hai von dat hai der slim onoardeg op ston. Zulfs zien bloudaigen kinder konden heur pabbe der nait van herkennen. Onvrede alom, dus.

Je zollen dinken dat dat wat van de leste tied is. Minsen worden ja aal kritischer. Mor dat is nait t geval. Datteg joar leden kwam dat ook al veur. n Old börgmeester van Laiwoarden was zo ontevreden over n schilderij van homzulf dat e verboden het, dat t tentoonsteld wuir. Staarker nog, zulfs as e dood was, moggen minsen t nog nait zain. En woarom? Hai von dat zien oren te groot waren. Rechtbaanke mos der aan te pas kommen en d'uutsproak was dat t pertret pas tien joar noa zien dood in de openboarhaid mog. En nou is t din zo wied, in t Vrais museum is t binnenkört te zain. Ik reken dat t museum der goud goaren bie spint, omreden elk en aine nou toch wel zain wil, wat veur flappers der aan de goie man zien heufd vaarfd binnen. En veuraal ook om te zain of ze inderdoad te groot binnen, of dat de börgervoader gewoon t ain of aander kompleks haar, betrevvende dij uutsteeksels. Din zel der toch wel al wat aan mekaaierd hebben, nee din?

Traauwens over grode oren sproken, hejje dij hond op veurpagina zain, mit zien oren van 29,2 sentimeter? Dij protesteert echt nait. Dij is zulfs opnomen in t Guinness Book of Records. Groots is e der op en zien boas ook. As n soort Dumbo staait e op foto. Allinneg vroag ik mie of, hou ze dij oren der nou toch zo braiduut op kregen hebben. Zollen ze mit n plakbaandje en nylondroad aan de loop west wezen? Of het de fotogroaf n poar lu inhuurd dij hail haard poesten mozzen om dij flappers zo aan t uutwaaiern te kriegen? Of was t toch n ventilator? Of zollen ze wacht hebben op n störmachtege dag? Prachteg is dat, dat je over n kört artikel zo lekker wegdreumen kinnen.

Nou mout je mit zukswat ook wel weer uutkieken. As je hailemoal "op de körde toer" willen en allinneg koppen lezen, kin je vrumde dingen kriegen. Zo las ik n vroage boven n artikel: "Hou voart n veerboot?" As je din n beetje te vlot mit joen konklusies binnen dink je: "Domme vroage, hin en weer netuurlek." Mor nee, t was aain of aander ingewikkeld verhoal over de aandrieven van zo'n voartuug. Haar k toch eerst hailemoal lezen most.

Dom hor! Ach kiek doar staait nog n artikel. "Waarken op kantoor schoadt de hazzens." Even goud lezen en wat bliekt? Minsen van datteg dij stief achter heur buro zitten, hebben de hazzens van aine van vatteg. n Daarde dail der bie optellen dus. Ais even kieken, ik bin nou ….. n Daarde dail derbie op….. Nog even en ik bin older as de oldste vraauw van Nederland.

Wegdreumen bie n kraande-artikel, da's soms mooi, soms maal.