Geesjen Doddema-Heidema.

Hejje t ook lezen lu?

Wereldwied is de vogelpest uutbroken. Wat n boudel nait? Je zellen in dizze tied mor n vogel wezen. Ale kans dat joe dij zaikte aanvlaigen komt. As je wind binnen om lekker boeten om te vruzzeln, mouje opains binnen zitten. Der schienen zulfs al paauwen te wezen, dij der aldernoast van in de stress roakt binnen. Nait wind om in n hokkie te zitten, mouje reken.

Mor as doeve hejje t ook nait makkelk. Dat is al nooit zo n mooi bestoan west ducht mie. Joa, as je nog tot de olderwetse törreldoeven beheuren en ongesteurd aargens in n groot bos leven, soamen mit joen törrelpartner din vaalt t meschain nog tou. Wieder liekt mie t mor niks. Van ale kanten worden ze in heur bestoan bedraaigd. As ze al joaren gezelleg mit n grode koppel in n stad wonen, hejje dik kans dat der wat minsen inains beweren dat dij smerege dingen toch zoveul overlast geven. Ze poepen ja de haile boudel vol. Dus, ze worden vongen en de stad uut zet, of in n minder gunsteg geval wordt heur botweg de haals omdraaid. Man, ze binnen heur leven ja nait zeker.

Paardie doeven lopen de kans te indigen as doeveborst op t bord van ain of aandere daaier-eet-laifhebber. t Kin ook wezen dat ze deur n doevemelker inzet worden om veur hom n pries te winnen. Dus din maggen ze eerst n zet nait bie heur gelaifde in de buurt kommen, zodat ze mor flink smacht kriegen. Din worden ze in n hokje stopt en mit n vrachtwoagen n hail inde votbrocht en din mouten ze mor zörgen om op aigen vleugels te stoan en t pad weerom te vinden, deur weer en wind, mit gevoar veur aigen leven, zodat heur boas weer n dikke vetleren medallie in zien medalliekaaste hangen kin, veur n prestoatie dij e zulf nait leverd het.
t Is mor goud dat klaaidoeven n haart van stain hebben, dij kinnen der van op aan dat ze aan barrels schoten worden.

Postdoeven binnen uutsturven ducht mie. Ik reken dat dij ook wel n stoerder leven had hebben as ons postbode hier, dij op n brommer bie de postbuzzen langesscheurt.

En nou hebben ze weer wat nijs verzonnen. Der motten doeven mit noar de oorlog in Irak. Dij hebben din wel n nuttege funktie. Zo as der vrouger knariepietjes mit de mienen in mozzen om van heur stokkie te valen as der gas vrijkwam en zodounde de mienwaarkers te woarschaauwen dat ze moaken mozzen dat ze votkwamen, zo mouten der nou doeven mit omdat dij bie n chemische gifwolke ook votdoadelk mit poten omhoog liggen goan. Mooi veur dij soldoaten vanzulf, dat ze din nog kans hebben om zuch in vaaileghaid te brengen, mor toch mor weer sneu veur dij doeven.

Mor wat ik mie nou ofvroag, hè? Zol der nog n soort doeven uutsturven wezen? Zal ja hoast wel, aans haren ze dij ja wel mitnomen noar de oorlog. Haren ze ducht mie aan aine wel genog had.
Mor ja, woar vin je vandoag de dag nog n goud opgelaaide vredesdoeve?