Geesjen Doddema-Heidema.

Hejje t ook lezen lu?

Der is n onderzuik dat al dattien joar achter mekoar, n poar moal per joar holden wordt. Vief tot zesdoezend minsen worden ondervroagd over heur leefpetroon. t Staait r vanzulf nait bie of dat nou aalweg dezulfden binnen of iederbod aander volk. Ik bedoul, dat zol toch n hail verschil wezen of nait din. Mor affijn, t gaait r om dat manlu aal degelker worden en vraauwlu aal lösbandeger.

Zo binnen der aal meer vraauwlu dij vinden dat seks boeten de vaste reloatsie wel kin. Zeuven joar leden von d'helfte van de vraauwlu dat gain pas geven, nou is dat nog mor 48 persint. Manlu doarentegen veraandern de aandere kaande op. De kategorie 'haailege boontjes' is stegen van 40 persint noar 46! In datzulfde onderzuik wordt ook vroagd of de doames en heren laiver uutgoan of thuuszitten. En wat bliekt? 48 persint van de manlu blift laiver gezelleg thuus op de baanke liggen zappen tot r op televizie wat oardegs veurbiekomt. Desnoods huren ze n video of n dvd. (Even veur de lu dij niks kinnen mit dizze ofkörten: dat is gewoon n filmschiefke.) En doun zai dat nou omdat ze dat zoveul gezelleger vinden? Nee man, t binnen gewoon kniepstuvers, dij ondervroagde kirrels. Want wat bliekt: uutgoan wordt ook aal minder.

t Is aal de schuld van de ekonomische malaise. Uut eten goan mit vrunden is zo duur worden, dus goan ze zulf thuus mor aan t kokkerellen. En doarnoa speulen ze nog gezelleg n potje ganzeborden of n aander dom spultje, aal onder t motto: 'Kiek ons t toch ais gezelleg hebben mit mekoar!'

Boetendes wordt de groep manlu dij orde, zekerhaid en kontrole aal belangrieker vindt aal groter. Zai vinden t ook slim belangriek om n vaste partner te hebben en in dizze tied mit veul waarklooshaid, vinden zai dat vraauwlu mor thuusblieven mouten. Je zellen as vraauw mor zo n dodderkop trovven hebben. Din leuf ik vot wel dat joe de kop wel ais toesteg wordt en je serieus overwegen om n boetenechtelke reloatsie aan te goan.

Dat lieken mie nou echt van dij types, dij heur vrunden nuigen veur n gezelleg oavendje eten bie heur thuus, mor din verwachten dat heur vraauw de bosschoppen dut, zörgt dat t huus der n beetje kaant uutzugt en din op tied t eten kloar het. Ofwassen mag t sloofke din wel intied dat de aandern aan t mins-aarger-die-nait binnen. Ach, mor nou lees ik ook nog dat telefoneren n stuk duurder wordt. Din heb ik nog n tip veur dij manlu: as je joen vrunden nuigen willen, stuur joen vraauw der even op fietse langes. Wel van teveuren goud ofspreken woar ze langsgaait en hou loat ze weer thuus is, hor! Zai kon zuch aans wel ais wat in de kop hoalen mit dij oardege kennizzen van joe.