|
Week 0210
Politieke draaikonterij.
De gemainteroadsverkaizens kommen der weer aan. Aanstoande woensdag maggen ie en ik, as wie dat willen, weer kaizen wel veur ons de kommende vaar joar van alles beslizzen mag. En dat is nog nait alles. Ook de landelke verkaizens loaten nait te laank meer op zuch wachten.
Nou las ik ook n artikel over hou wie Hollanders aandern vertraauwen. En wat bleek? Autoverkopers schienen de aller-onbetraauwboarste lu te wezen en doar vot achteraan kommen politici. Nou is t wel ais zo vanzulf, dat ze ons veur de verkaizens golden baargen beloven, terwiel dat in de doaropvolgende joaren heuveltjes blieken te wezen. Mor goud, zai binnen ook ja mor minsen, dij te moaken hebben mit aandere lu, mit aandere mainens, of mit alerhande wetten en regeltjes, woar zai eerst meschain wel nait zo gaauw aan docht haren. En lu mit gespleten tongen zellen der aaltied wel blieven.
Mor nou is der n old Knoalster, dij tegenswoordeg in Emmen woont, dij t wel hail slim moakt. Loat ik even veurop stellen dat hai gelokkeg allinneg n zetje kandidoat-koamerlid west het en dat dat niks worden is. Mor n Jan Doedel eerste klas is t wel. Wel ik bedoul, wollen ie waiten? Ach je waiten ja wel, dij man mit zien groot riebewies, dij n beetje gitaar speulen kin en dij nou net n Grunneger CD opnomen het. Tou, hou hait e ook weer, dij eh… Henkie draanktoene, nee, hou was t ook weer, o, joa, Henk Wijngaard.
Hai kwam landelk in t nijs dou hai zuch aanmeld haar op de kandidoatenlieste van dij nije pertij Leefboar Nederland. t Wuir braiduut uutmeten. Nou was t wel zo, dat Jan Rap en zien moat zuch doarop aanmelden kon, mor wat bezielt zo'n man, zol je dinken.
Op de regionoale televisiezender mog hai uutleggen hou of dat wel zo kommen was. En wat zegt dij dodderkop? "Ik was aan t surfen op Internet en ik wol mie aigenlieks allinneg aanmelden as lid van dij pertij, want dij standpunten stonden mie wel aan. Mor ja, ik heb t verkeerde vakje aanklikt." Je zollen toch reken dat aine dij zien riebewies het wel n moes besturen kin en dat hai as e laidjes zingt, wel lezen kin, mor nee hor, Henkie haar zoch mishad. n Poar doage loater ston der n aander verhoal in t kraande. …Hai wol zuch aigenlieks aanmelden veur de gemainteroad, instee van veur de 2e koamer. Doar was t even fout goan…
En wat lees ik dizze weke? t Was n groot sukses west, dat hai t verkeerde formelier invuld haar. En de publisiteit dij hai hoopt haar te kriegen, het e kregen ook en nog wel op n gigantische menaaier! Boetendes, de politiek misbruukt de minsen, volgens hom, doarom kon hai de politiek wel even misbruken. Zien optredens binnen mit twinteg persint stegen. En as der aine belt van Radio 3 FM, din vragt hai eerst of ze zien nijste ploatje ook draaien. As bliekt dat dat nait zo is, zegt hai dat ze oetlullen binnen. En din beweert hai ook nog, dat e zuch meer kunstenoar vuilt en: "Nee, man ik wil hailendal nait in de politiek."
n Kunstenoar? Wat? n Kunstemoaker ist. Dit is draaikonterij van de eerste orde. Ik kin doar verder kört over wezen, as ik n radiopergram haar zol ik van zo'n draaikont gain laidje draaien!
|
