Geesjen Doddema-Heidema.

Hejje t ook lezen lu?
Wie as verkeersdailnemers worden aan ale kanten in ons bewegen bepaarkt. Nog even en wie mouten eerst eksoamen doun om lopend over t voutpad te maggen en as ie dat bievubbeld mit n kinderkoetse doun willen, mouje n extroa rebriek derbie hebben.

Haren we al aaltied n auto-riebewies, n vrachtwoagenriebewies, en n motorriebewies. Sunds n joar of wat mouten lu dij op de plof rieden willen ook al n bromcertifikoat hoalen. En nou is der weer n nij idee. Fietsers mouten ook n diploma hoalen. En din ook nog n theorie- en praktiekdail. Aal dij aandere riebewiezen kinnen nait meer verlengd worden, moar wie mouten mit ons allen leuven aan herhoalenskursussen. Jongern maggen s nachts nait meer rieden en gain aandern mitnemen in d'auto. Minsen dij nog mor net heur riebewies hoald hebben kriegen veur elke overtreden strafpunten en lopen kans dat ze t roze pepiertje weer inlevern mouten en vannijs eksoamen doun.

Dat is wel goud veur d'ekonomie. Want loze koppen hebben alvast uutfigelaaierd, dat joarlieks 500 minsen weer eksoamen doun mouten. Dat is goud veur bienoa honderdoezend gulden aan inkomsten veur t CBS as dat autorieders binnen en veur t geval t motorrieders binnen is dat nog beter, din levert dat honderdtwintegdoezend gulden op. As zai in ain moal sloagen din. Aans is t nog beter veur de stoatsinkomsten.

Boetendes kriegen we volgend joar in hail Europa negen massoale verkeerskontroles, woarbie honderddoezenden automobilisten aan t kaande dirigeerd worden. t Doezelt joe n beetje? Ie kinnen t aalmoal nait meer volgen?

Let op. Ik geef joe n veurbeeld. Stel, joen zeun van 23 wil soavends mit d'auto vot. Din treft t net, dat der n wiekagent op zien mountainbaik langes-komt, mit n snoerloze kompjoeter in zien rugzakkie, dij hom veur op d'inrit aanholdt. "Mag ik even dien riebewies zain, mien jong? A, ha! Doe bist nog mor 23. Din magstdoe nait rieden bie duuster." Joen zeun zegt, dat hai d'haile nacht votblift en pas as t weer licht is noar huus wil. Oom agent kontroleert nog ais de doatem van t riebewies. "Dat muit mie din wel veur die, mor mörgen is dien veurlopege riebewies verlopen en moust eerst vannijs eksoamen doun. Kist ja wel op plof goan. Ik zai hier in mien bestand dastoe n bromfietssertifikoat hest! O… Hest dien plof verkocht? Tja, din zit der aans niks op, as dastoe mor op fietse gaaist."

Joen zeun gaait noar t schuurtje en wil zien fietse pakken. Din zugt e dat zien baand lek is. Pa zien fietse din mor. Och, joa, dat is ook zo, dij is al zovoak sloopt veur onderdailen, dat is al n wrak. Din moe heur fietse. Hai komt veur op d'inrit, woar de agent nog aal staait. "Wat is dat mien jong? Dien moe heur fietse? Dat gaait din nait deur, hè. Dien fietsdiploma is allinneg veur herenfietsen."

Nou is dit touvalleg n slim mitdinkende agent. Hai zöcht nog ais in zien kompjoeter. "Ais kieken of dien moe die meschain votbringen kin. Ach nee, ik zai t al. Dij het n enkelvoudeg fietsdiploma. Zai is zakt veur heur passagier op pakkiedroageronderdail. Sneu veur die, mien jong. Moust vandoage mor thuus blieven."