Geesjen Doddema-Heidema.

Hejje t ook lezen lu?
Dat dut mie deugd, omreden as ie lezen hebben, wat din ook, is dat n taiken dat t joe nait aan d'ogen mekaaiert. Mor t betaikent veuraal dat ie in ain stok weeromme kommen binnen van vekansie. En doar bin k slim bliede om.

Want waiten ie wel, dat op vekansie goan levensgevoarlek wezen kin en dat je der van alles van oplopen kinnen? Nee, dat wozzen ie nait, aans was je nait goan vanzulf. En de kraandejonges binnen ook wel zo handeg om dat pas in t kraande te zetten as de mainste minsen al vot binnen, dus dij hebben der niks meer aan. Mor ie hebben mie ja. Ik hol veur joe de kranten wel n beetje bie, intied dat ie der nait binnen. Dus… doar goan we din.

Kiek, dat de raaize noar joen vekansieadres en weerom nait zunder gevoaren is, huif ik joe nait vertellen. Om mor n poar te nuimen: zwaarde zotterdag op de Fraanse wegen, vlaigtugen dij de roadens nait op tied intrekken of uutklappen en overvalen onderwegens as ie in zudelke landen bie de weg binnen.
Mor waiten ie wat r gebeuren kin, as je der ainmoal binnen? As je pech hebben is t weer slecht. Nou paardie lu hebben t waiten kind. Dikke störm het r west op sommege plekken en tinten en ropschuurtjes binnen hailemoal vernaild. Mor ook bie t mooiste weer van de wereld bin je joen leven nog nait zeker. Din kinnen ie last kriegen van t zogenoamde Willem Ruis-syndroom. Wat dat inholdt willen ie waiten? Nou kiek, pabbe (of mamme vanzulf) is t haile joar drok aan t waark. Tied veur partner en kinder het hai (of zai) bienoa nait. En din mot dat opains in de vekansie aalmoal inhoald worden. Dat kin nait goud goan vanzulf. Boetendes kin je van vekansie psychisch ontregeld roaken. Ie kinnen last krigen van vekansiestress, alderieselkste winst, hailemoal in toeze roaken, lieden aan sloapelooshaid en as klap op de vuurpiele: n akute psychose oplopen. t Schient dat r wel twijhonderd lu per joar tiedens of deur de vekansie de kop zo drel kriegen, dat d'ANWB der aan te pas kommen mout om ze weer noar huus te brengen.

Kiek, dat haar joe nou aal overkommen kind. Gain last van had? Mooi zo. Ik ook nait, mor dat is gain wonder, omreden ik goa gewoon nait op vekansie. Kin k nait wachten. k Mout veur joe de kraande lezen, ja.

En nou binnen ie der weer. Gelokkeg mor. Nog even n woarschaauwen aan de manlu. As ie in t strakke pak weer noar joen waark mouten, dou der din denken aan, dat je de strikke nait te stief omknuppen. Da's nait goud veur d'ogen. En din bedoul ik nait, dat je meschain n slechte smoak hebben wat kleuren of motieven van joen stropdaze aanbelangt. Dat dut aander lu allinneg mor zeer op d'ogen. In Engeland hebben ze noamelk ontdekt, dat as je de boudel te steveg vastdoan hebben, je de drok op joen ogen vergroten. Doardeur krieg je schoade aan d'oogzenen en verlais je joen gezichtsvermogen. Dus, slok ter bie hangen loaten dij boudel. Din zain we mekoar over vattien doage weer.