|
Week 0247
Rekloame.
Hejje t ook lezen lu? Of, in dit geval kin ik beter zeggen: hejje t ook al zain? Van de weke zag ik n nije rekloame van n landelke verzekernsmoatschappij. t Ging as volgt: n Plougje raddraaiers stoan wat te klieren tegen n ploug ME-ers. n Beetje schelden n beetje gooien mit van ales en nog wat. De ME-ers hebben schienboar net thee-of kovviepauze. Ze stoan teminnend mit koppies in d'haand n beetje bienander te proaten. En din gebeurt t. Ain van de oproerkraaiers gooit n aansteker noar de agenten. En woar komt dij terechte? Juust midden in n koppie thee. En dat is t slimste nog nait. Nee, t komt in t koppie terechte van de klaainste ME-er. n Liliputter, aalhouwel, ik leuf dat je dat nait meer zeggen maggen en dat je hom n klaain persoon nuimen mouten.
Hai zucht der slim heldhafteg uut, dat mout zegd worden. In volledege uutrusten mit n dikke board, t is net n echte olderwetse ridder. t Mannechie wordt slim vergreld, nemt n aanlopie en springt op de rugge van n peerd. Nou, ja, peerd ... t is meer n pony, en meschain is t zulfs wel n dwaargpeerdje. Tot grode hilariteit van zien kellegoas en vanzulf tot nog groter lol van de tegenstanders stoft e op de groep raddraaiers of. Mor t laggen vergaait ze wel. Hai mept noar links, hai steut veuruut mit zien woapenstok, hai dailt klappen uut noar alle kanten en t duurt mor even of t tuig dropt mit steert tussen de bainen òf. Zien kellegoas binnen slim groots op hom, dat sprekt. En as klap op de vuurpiele staigert t peerd nog even mit de dappere ridder op de rugge. t Liekt net Ivanhoe, kin ik joe wel vertellen. Doar liekt t der slim op dat der n stand-in gebruukt is, want man en peerd binnen opains n stuk groter.
En wat wil ik hier nou mit zeggen? Wedden, dat der kommentaar komt op dizze rekloame? Protesten bie de media-road, of wel ook de kontrole over de rekloame-spotjes het. En din woarschienlek nog nait ains van de klaaine personen zulf, mor van lu dij zo neudeg veur de onderdrokten in dizze wereld opkommen mouten. Dij van zuchzulf vinden, dat zai aandermans leven en welwezen regeln mouten.
Meschain herinner je joe nog wel dat der op zummermanefestoaties wel ais t onderdail dwaarggooien holden wordt. Schande wordt doarvan sproken. Mins-onterend nuimen de meroalridders dat. Terwiel de dwaargen zulf der gain perblemen mit hebben. Zai loaten zuch geern n inde votgooien, letterlek din ook nog, veur n oardeg zaksìntje. Ik reken dat dizze akteur in t rekloame-spotje ook zien seloares wel krigt en nait dwongen is om mit te doun. Mor ie kinnen der op reken lu, binnenkört zellen de ingezonden braiven wel weer in t kraande stoan, woarin schande sproken wordt van dizze rekloame.
Och, ik reken mor zo, din hevve twij moal lol. Ainmoal om de rekloame zulf en ainmoal omdat we de braiven van dizze zoesklötten aankommen zain hebben.
|
