Geesjen Doddema-Heidema.

Hejje t ook lezen lu?

In Nijschanze is n seksklub ofbrand.

Tsja, zo'n kans zit der aaltied in vanzulf. Goa mor noa. Dij wichter zetten heur klanten ja in vuur en vlam en din krieg je brandgevoarleke sitewoatsies. Ook dingen as "hot seks" of "brandende laifde" en zukswat meer zörgen veur n bruiierege atmosfeer. En as ze ainmoal verhit bezeg binnen slaogen de vonken der vanof . En din krieg je roare toustanden.

Gelokkeg binnen de doames der aalmoal goud vanof kommen. t Het der nog wel even om baantjed, omreden n poar mozzen langs de regenpiepen om dele boundern. Mor noar verluudt, wazzen ze zoksoort meneuvels (van dat piepen, ja) wel wind, dus dat ging heur oardeg smui of. De buren hebben t r nog wel even waarm van kregen, omreden dij wichter in heur nachtgoud noar boeten mozzen. Nou wait ik nait of t echt zo is, mor ik stel mie zo veur, dat doames mit zo'n affeer nait sloapen in laange flenellen nachthemden, dij heur hooggesloten om d'haals zitten.

En wat is nou zo singelier? Dij brand is ontstoan op n koamertje van n doame dij der net nait was! Boetendes op t mement dat ale aandere vraauwlu lagen te sloapen. Dus aal dij hitsege haitkonten van kirrels wazzen al laank vot. Dij kinnen t dus nait ommaans had hebben.

En nou las ik zo'n beetje n weke loater, dat d'aigenoar van de hoerekeet mit tonen in d'aaske zit. "Wichter verdainen niks", zegt e.
En zai hebben t geld zo haard neudeg, omreden zai der n dail van noar heur femilieleden in t Oostblok sturen. Zai brengen nou vanzulf ook gain geld in t loachie van d'aigenoar. Hai mout netuurlek wel zörgen veur onderdak en eten en zo as hai zulf zegt: "Zo riek bin k nou ook weer nait."
Dus as ik dat goud begriep, hebben ze vergees kost en inwonen en veur de rest waarken ze op provisieboases.

Nou wil dij aigenoar geern n lapke grond van de gemainte hebben om doar noodlekoalen hin te zetten. Din hebben zien wichter weer onderdak en kinnen ze weer pokkeln. Hai het nog wel n aander bordeel, mor doar kinnen ze nait terechte. Nou ja: n beetje re-organiseren dij boudel, liekt mie. Wichter kin je best in plougendainst waarken loaten, docht ik zo.

n Spesioale aktie holden kin netuurlek ook. Gain triootjes meer. Nee, kwartetten. Das thuus veur de manlu dij doar op bezuik kommen ook ja n stok ainvoudeger uut te leggen: "Ik goa vanoavend kwartetten, Miep. Huifst mit t eten nait op mie wachten." Kiek, kinnen ze ìndelk ais n moal de woarhaid zeggen, in stee van alerhaande smoezen te verzinnen over woar ze nou weer touholden hebben.

Meschain ook wel n tip veur aal dij grode aannemers, dij heur klanten bezeg holden mouten. Der is gain baauw-fraude-kemmissie dij der over vaalt, as ze de post: "Reloatsiegeschenk: kwartetspel" in heur schareboukholden opvoeren.

Mor goud, k hoop veur dij wichter dat ze gaauw weer aan t waark kinnen. Din zitten heur femilieleden der binnenkört teminnend weer waarm bie en binnen dij ook weer uut de braand!