|
Week 0327
Manlu.
Hejje t ook lezen lu?
Opvalend veul berichten over manlu, dij domme, roare, gevoarleke, onveurstelboare, onbegriepelke dingen doun. En doarbie komt ook nog ais n onderzuik, woar uutkommen is, dat manlu nait zo best allinneg wezen kinnen. O, dat is joe nait zo zeer opvalen? Nou, hier hejje din n poar veurbeelden:
Der is n kunstenoar, dij t in zien stomme kop huil om schilderijen te moaken mit achttien leventege goldvizzen. Hai stipde ze in de vaarve en luit ze din op t pepier sparreln totdat ze dood wazzen. De ofdrukken van de steerten van de wanhopege daaier nuimde hai din kunstwaarken. De landelke inspektiedainst daaierbeschaarmen het de videobanden, woar dat op te zain is in beslag nomen. t Slimste was, dat dij kunstenmoaker zuch wel veurstellen kin, dat bepoalde lu der wat perblemen mit hebben, mor, t is volgens hom moderne kunst en din mout je joe ofvroagen: "Wat bedoult de kunstenoar?" Ach en daip in n haart haar haizulf t r ook nog wel stoer mit had. Hai haar noamelk twinteg vizzen kocht, mor noa de achttiende kreeg e der zulf n beetje n maal gevuil bie en de leste twije het e leven loaten, dij worden nou volgens hom goud verzörgd. t Stadsmuseum van Woerden haar gain kommentaar op de kwestie. n Dag of wat loater las ik t bericht dat t museum de schilderijen toch mor weghoald haar, omreden der bedraigens kommen wazzen aan t adres van de kunstenoar, t museum en de gemainte. Kiek en dat mos ja nait uut de haand lopen. Zo'n kunstenoar en zo'n museumdirekteur, doar is mor ain oplözzen veur: n klap van n walvizzesteert.
Twij manlu in Stad haren aalbaaide vrezelk smacht noar n kreket. Nou wol t geval dat r mor aine meer was. En wat deden dij hampels? Nait in de minne oplözzen: wel t eerst was, mog hom hebben, of desnoods t ding verdailen. Nee, zai konden zuch nait bedappern. Klappen vuilen der, n kopsteut en zodounde twij bloudneuzen. Plietsie mos der bie, om ze uut nkander te hoalen. En dou ze vot wazzen, lag de kreket ook nog op de grond, dus gain aine is der wiezer van worden.
n Mislokte Chinese zoakenman dij in dikke geldperblemen zat het zuchzulf te koop aanboden as sloaf, om doarmit zien schulden of te betoalen. Plietsie het hom arresteerd, dou e pamfletten aan t uutdailen was, om zuchzulf aan te priezen. Hai mos zesdoezend dollar hebben, om zien ollu terugge te betoalen, dij haren om hom te helpen heur huus al verkocht.
n Man in Zuud Holland wol de kikkers in de singel veur t huus stil hebben, omreden zien vraauw last haar van t gekwoak van dij daaier. Zai haar de roamen potdichte, oordoppen in en nog kon ze nait sloapen van dat lewaai. Wat dee dij slaif, hij gooide der n stuk of wat emmers streuzolt in. t Rezeltoat is, dat zai nou wel weer sloapen kin, omreden de kikkers dood of der vandeur goan binnen. En heur man kreeg n perses aan de broek.
Manlu kinnen nait goud allinneg wezen. Kirrels van viefteg dij traauwd binnen leven over t aalgemain vaar joar langer as vrijgezellen en drij joar langer as geschaaiden manlu. Dij allaingoanden dinken nait goud om zuchzulf, zai zoepen haarder, roken meer en eten ongezonder. En ze plegen ook nog voaker zulfmoord, as manlu mit n partner. Dat komt, omdat zai gain vraauw hebben dij n beetje op heur let.
Vraauwlu, willen ie de kommende tied n beetje op joen kirrel pazen? Ik wait, dat vaalt nait tou zo in vekaantietied, mor zai hebben t slim neudeg. Veurdat je der op verdocht binnen, binnen zai t rechte pad kwiet. En ik wol joe zo geern aalmoal weer gezond bie de site trevven over n week of zezze.
|
