|
Week 0240
Dikker worden in vekantie
Op vekantie goan het nait alinneg zien zunnege kanten. Ie waiten ja, dat de raaize noar de plek van bestemmen al nait zunder gevoaren is. Joen vlaigtuug kin delestörten, joen train kin ontsporen, joen bussjeffeur kin achter t stuur in sloap valen, of ie kinnen zulf mit joen ropschuurtje achter d'auto in de slip roaken.
Ainmoal op stee is de ellinde maisttied nog nait doan. n Bulde minsen kriegen din inains de grootste roezie mit nander, echtschaaidens binnen aan d'orde van de dag. Of ain van de partners roakt hailemoal in de stress. Of ie binnen n hail inde reden om veuraal n zunnege vekantie te hebben in Itoalië of Frankriek en din barst doar n dunderbuie lös mit hoagelstainen as doeve-aaier, zodat joen auto en ropschure deruut zain as n krennebollechie doar joen jongste zeun de krenten net uutpuuld het. Of der komt n dikke windhoos langes, dij joen haile hebben en holden in de lucht slingert en n poar honderd meter wiederop in n bulde weer delekwakt.
Mor goud, t kin wezen dat joe van aal dit onhaail niks overkommen is, en dat ie n mooi rustege vekantie had hebben, zunder ongelokken en zunder roezies. Mor din kom je thuus. En din komt veur joe de ellinde. Alle Nederlanders tesoamen, binnen noamelk noa de vekantie zes-en-haalf miljoun kilo aankommen. Aal dij lu binnen drij of vaar kilo dikker worden in de vekantie. Nou? Doar bin je mor even mooi kloarmit, nait? En 80 persint van aal dij dikkonten wil dij kilo's ook geern weer kwiet. Nou, din huif je kraande der mor op noasloan en de meugelkheden vlaigen joe om de oren.
Zo las ik, dat je bievubbeld kangeroevlees eten kinnen. Nait vet, hoast gain cholesterol en veul beter as schoabevlees of rundvlees. In Austroalië willen ze de minsen al aanpraoten dat ze kangeroe op de barbecue doun mouten. Doar worden toch 17 miljoun in t joar van ofschoten, dus vlees zat. Nou is dat meschain n beetje ver vot, om doar noar slachter te goan, dus nog n aandere tip. Goa noar de shoarma-tinde. Der is n test doan deur n landelk dagblad en doaruut bliekt dat van de 58 zoaken mor 12 n beetje redelk uut de sievers kommen. Vatteg bedrieven kriegen n nul. t Komt zulfs veur dat t vlees bedurven is. De douken woar de koks heur handen aan ofvegen, zollen zo in de waarkploatse van n gerage kinnen, schrieven ze. Nou en ie waiten wel wat of der gebeurt as je bedurven vlees eten, ja. Dik in de schieterij, en n poar doage moage van slag. Och, dat scheelt joe zo n kilootje, hor.
As je dit nou te drastisch vinden, kin je ook nog 's mörgens vroug n poar dreuge beschuten eten bie joen kopke thee. O, dat willen ie nait, omreden dat t zo'n gepuul is om zo'n beschuut uut de verpakken te kriegen, en dat e joe aalmoal aan barrels op bord komt? Nou, doar hebben ze nou wat op vonden, hor. De grootste beschutenmoaker van dit laand het doar drij joar laank over noadocht.
Hazzen-schraap-sessies op de haide, indeloze vergoaderns op t hoofdkantoor. Van alles hebben ze der aan doan. En nou hebben ze t. De beschuten kriegen in t vervolg n houkje deruut. Doar kin je joen vinger insteken en zo de beschuut optillen. Nou? En dat in drij joar tied, wat n revolutie nait? As ze mie nou even beld haren, haar ik ze t zo wel vertellen kind. Ie doun t bovenste stukkie pepier derof, doarveur zit der ja zo'n rood lintje in. Ie hollen joen buzze plat, schoeven de rolle der mit de open kaande noar beneden in, zetten buzze rechtop en strupen t pepier derof. Nog even t ribbeltjes-kertonnen pepietje derbie vot pakken en kloar is kees. Ainvoudeg as wat. Desnoods kinnen ze op boetenkaande van t pak wel n gebruuksaanwiezen schrieven, mit ploatjes derbie veur de dompies onder ons.
Wat ik mie nou ofvroag, hè? Zollen dij beschutenbakkers, dij doar drij joar laank op de beschuutkrummels zeten hebben, doar ook loon veur kregen hebben? Bie dij gedachte begunnen mie de broodkrummels te steken.
|
