|
Week 0202
Joarwizzeln.
Ain en dezulfde kraande kin op ain en dezulfde dag over ain en t zulfde onderwaarp mit verschaaiden kraandekoppen sprookjes vertellen.
Zo ston der bievubbeld: "Joarwizzeln in Noorden redelk rusteg."
En din komt t verhoal. Plietsie en brandweer mozzen weliswoar herhoaldelk in aktie kommen. In de pervìnzie Grunnen kwamen 226 stroatvuren veur. In Drinthe waren zwoardere branden in twij huzen, woarbie ook n hond doodkwam, n gymestieklekool en n leegstoande boerderij. n Man arresteerd omdat e zien buurtbewoners stoken het mit n mes. n Dronken asielzuiker dij n mitbewoner mit n mes stoken het. n Aandere asielzuiker dij n mitbewoner mishandeld het. n Roam intrapt van n kantoor, en nog n man in t bain stoken mit n glasschaarve.
En din lees ik t volgende artikel: "Joarwizzeln in Stad verlopt relatief rusteg. Vervolgens komt der n opsommen van ale ellinde. Vreugdevuren, dij toustoan wazzen. Zover binve al zonken. Wie leggen ons der gewoon bie dele, dat zuk soort dingen gebeuren op Oljoarsoavend. Minsen doun t toch, dus loaten we t mor legaliseren. Mor der binnen aaltied gounend dij gain moat holden kinnen, vanzulf. Kwakken ze n auto bovenop zo'n gelegaliseerde buurtbulde, tja, dat mag vanzulf weer nait. Allerhande vernailens aan auto's, winkelroamen en huzen. Duutsers dij mit pistolen in de lucht schaiten. Plietsie, brandweer en milieudainst de haile nacht in taauw. Dat nuimen ze din rusteg.
Dinken ie ook nait dat dij lu laiver rusteg thuus zeten haren mit heur vrunden of femilie?
In Muzzelknoal, Winschoten en Twijzelerheide kinnen ze der ook wat van. Doar stoken ze vuren op en as de brandweer dat bluzzen wil, worden ze hinderd deur de aanstichters. Alderdeegs is t zo dat de brandweer allinneg onder begelaaiden van plietsie de boudel uutspoiten wil.
Wat? t Is mor goud dat ik gain brandweerkommedant bin. Ik haar eerst even dij dwaarsliggers de bainen onder t gat votspoten en doarnoa de branden blust. Mor dat zel wel weer nait maggen, konden dij laive jonkies ja wel ais snöddeverkolden van worden.
Din binnen der nog idioten in overvloud dij mit draank op achter t stuur van d'auto zitten goan. Aalmoal hail gewoon, hor. En nog n kop: " Joarwizzeln verlopt kaalm in t haile laand." En din lees je over doden en zwoar gewonden deur vuurwaark, rellen, brandjes, vernailens, incidenten en vechtpertijen. Binnen wie nou al zover ofstompt, dat as t aine joar veur twij miljoun gulden aan vernailens aanricht worden en t joar derop veur 1,9 miljoun, dat wie dat al rusteg nuimen. Ik wait nait hou of t mit joe is, ik aarger mie doaraan. Elke vernailen is aine teveul. Elke dode en elke gewonde? Ik zol hoast zeggen dat binnen twije teveul.
En din mouje ook nog reken dat nait alles in t kraande staait. Want wat schrift dezulfde kraande op n aandere bladziede? "Plietsie van Grunnen "timet" t nijs wat aans." De veurlichters waren veureg joar nogal vlot west mit heur verslag noar "de media". De aandere veurlichters in t laand haren nog eerst even rusteg heur euliebollen opeten en heur glaske champagne opdronken. Inains wuir dat Grunneger nijs landelk oppakt en bie gebrek aan beter zomoar nationoal nijs. Alle kraanten meldden dat de joarwizzeln in t haile laand rusteg verlopen was, mor in Grunnen wazzen de vrezelkste rellen west. De Grunneger veurlichters waren zo flaauw as n porre en besloten om dit joar ook mor weer wat lakser te doun.
En: zo lees ik aan t inde van t artikel, t rezeltoat was, dat in de kraanten te lezen ston, dat in hail Nederland de joarwizzeln rusteg verlopen was, óók in stad.
Doar lees ik toch dudelk uut, dat der nog hail wat slimmere dingen gebeurd binnen, mor dat was vast pas bekind nou sloetenstied van de drukpaarzen. Och, en n dag loater is t ja al gain nijs meer.
|
