|
Week 0342
Männergarten.
Hejje t ook lezen lu?
In Duutsland hebben ze weer ais wat nijs. Opvang veur manlu! En t is ook nog n groot sukses, as je de kraande leuven maggen. In eerste instantie docht ik (ie kinnen mie zo langsoam aan wel, eerst mien aigen gedachten derover goan loaten en din pas t artikel goud lezen) dat dat wel zo'n soortement blief-mie-van-de-pokkel-huus wezen zol. Kon wezen toch, omreden ook op dat gebied gaait de e-man-siepoatsie schaande genog gewoon deur. Nait allinneg vraauwlu en kinder worden de dupe van huselk geweld, mor manlu net zo goud vanzulf.
Mor nee, wat wil nou t geval. Dit is n soortement van kresj en din nait veur lutje potjes, mor veur manlu dij op zotterdagmiddag nait mit heur vraauw aan t winkeln willen. Dij kirrels kinnen deur heur wederhelfte inleverd worden bie de Nox Bar in Hamburg. Frau Antje betoalt doarveur 10 Euro en din is der Manfred tot zes uur onder de pannen. Zai krigt n koartje mit om hom aan t inde van de middag weer op te hoalen (zollen ze baange wezen dat zo'n vraauwmins de verkeerde kirrel mitnemen wil?) en hai wordt doar vervolgens zinvol be-zegholden. Hai krigt n noamploatje op, aans zol e nog wel ais verdwoalen kinnen,ja. Hai krigt waarm eten, twij potjes bier, der is n groot tillevizie-schaarm woar voetbalwedstrieden op bekeken worden kinnen, der binnen spullechies-kompjoeters en as e doar aalmoal niks aan vindt, kin e n kurses dou-t-zulf volgen. t Hait hail toupazzelk Männergarten, Fröbelschoultje hait doar ja Kindergarten, wat n fantezie nait? D'eerste weke binnen der 20 manlu brocht en de twijde weke al 27. Ze mozzen der eerst wel n beetje om laggen, volgens de kleuterjuf, ach ik bedoul de bedriefslaaider, mor goandeweg kwammen ze derachter dat ze meroakel mit de aandere manlu overweg konden.
Nou vroag ik joe. Dat is toch aarmou van de alleriesdelkste soort! Wat veur lu binnen dat? Binnen dij kirrels van dij slappenscheten, dij zuchzulf nait vermoaken kinnen as heur vraauw der even nait is? Van dij watjes zel k mor zeggen? Zal toch wel nait, aans zollen ze toch wel geheurzoam mitgoan noar de Einkaufshalle en veur moeke t karrechie schoeven en de bosschoppentazze in d'auto zetten. Loie Everts din? Baange dat ze stofzoegen mouten of ofwassen of strieken of zukswat as ze in huus blieven? Of van dij stiefkoppen, dij heur zin hebben willen? Nein! ik goa nait mit om bosschop. Nein! ik wil nait allinneg in huus blieven. Komt aalgemain veur, hor, bie kleuters, zo'n nee-foase. Gaait vanzulf over, doar gruien ze wel overhin.
Ik reken zo, dat dit massoale volksverlakkerij is. Lovve eerlek wezen, as zo'n man nait mitwil, kloar. Doar huif je toch gain kirrelkresj veur opzetten. Din bin-nen der wel goudkopere oplözzens. As e zuch nait allinneg redden kin mit eten, kin e ja wel bie zien moeke eten goan. En as e geern noar de kroug wil, om mit zien kammeroaden n pilske te drinken en dom over voetballen te proaten kin e dat ook ja gewoon doun. Veur 10 Euro kin e der ook nog wel n Bratwurst bie kriegen. Wat is mie dit veur n verloren generoatsie. Binnen aaltied wel van dij handege jonges dij overaal n sloatje uut sloagen willen en der binnen nog genog gemakzuchtege ozzekoppen dij der instinken ook.
Loat mie t nait maarken, manlu, dat ie joe aargens in Stad in zo'n Männer-garten stoppen loaten. Kin je beter bie mie kommen. Kost joe gain 10 Euro en ik zörg wel dat ie joe n beetje zinvol bezeg holden. Kinnen bievubbeld mooi even mit mie om bosschop of zo...
|
