Geesjen Doddema-Heidema.

Hejje t ook lezen lu?
Nou ja, ook lezen. Vonden ie nou ook dat der de ofgelopen weken zo waineg echt nijs in kraande ston? Ik heb der om eerlek te wezen toch al nait zoveul lol meer in, omreden wie nou ja n ochtendkraande hebben. De helfte van wat derin staait heb ik din de veurege oavend al op t nijs heurd of veur regionoale televizie zain.

En wat te dinken van de volstrekt onneuzele keuze van veurpagina-nijs. Zo mos ik op de eerste bladziede lezen dat de helfte van n piroatenzenderlaidjes-kwelend duo mit griep in berre lag, en dat de sterren nait optreden konden. En de volgende dag wuir der op de daarde bladziede braid uutmeten dat datzulfde stel verhuzen ging en dat de fans zuch nait ongerust moaken huiven, dat ze noar t Gooise metras vertrekken mor dat ze gewoon in Winschoten wonen goan. Zeg nou zulf, dat is toch nijs van t niveau fanklub-bloadje of in t beste geval veur t bokkeblad van t gehucht woar ze wonen. Toch nait veur n grode regionoale kraande!

Ook al veurpagina-nijs scheen t fait te wezen dat n laidjeszingende röddevanger inains last het van n hernia en nou veurlopeg nait meer optreden kin. Is ja slim sneu veur de betrevvende petient, mor mot dat ook veurop stoan? t Wordt tied dat der serieus nijs inkomt, bievubbeld dat der n pertij komkommers deurdraaid is, vanwege t zummerse overschot. Dat komt ja beter bie.

Mor goud, ain berichtje sprong deruut. n Woarschaauwen was t. Wat je ja wel voaker lezen. Bievubbeld over kinderspeulgoud, woar de lutje beudels stokken van inslikken kinnen. Of potjes gruinte woar glasschaarven inzitten. Of auto's woar de remmen nait goud van binnen. Dit keer ging t om vlaigenmeppers, dij gevoarlek wezen konden veur minsen. Ja, stel joe veur, veur de minsen.

Nou heb ik ook zo'n dinkje in huus. Hai dut t al viefentwinteg joar tot volle tevredenhaid, het n zwaarde stele en n oranje flappertje. Kleur is n beetje uut tied, mor t het zien funktie ja nog nait verloren, onzin dus om der n nije veur te kopen. En nou zollen dij dinkjes gevoarlek wezen veur minsen? Wat kin joe der in t beroerdste geval nou van overkommen, dat je joe zulf op d' handen haauwgen meschien? Of dat je van grammieterghaid te haard meppen op de kop van joen paartner as doar net touvalleg n nefie zit? Nee, man. t Gaait om elektrische vlaigenmeppers. Ze schienen t medel van n tennisrekket te hebben en je kinnen de muggen dermit elektrokuteren. Tja, din mout batterij wel hoast in t steeltje zitten. En woar hol je zo'n ding vast? Krek…. bie t steeltje. En nou schient t zo te wezen, dat de lu dij doar zo'n lutje onschuldeg muggie mit doodmoaken willen, zulf n elektrische schok kriegen. Hartstikke gevoarlek.

Man, man, ... wel koopt nou zo'n ding. Ik wol joe toch wiezer hebben. Ik zai t al veur mie, aal dij lu dij as echte Agassi's deur t huus boundern en mit de backhand de gevoarleke vijand versloagen willen. Dat is toch gain verholden geliek. Zo'n mepper en zo'n muggie. As t der goud op aankomt is t mor goud dat dij dingen terugge roupen worden. Kommen dij lu teminstend mit n schok tot de ontdekken, dat ze n slim overbodeg ding kocht hebben. En niks is goudkoop as je t nait neudeg binnen.

Mor wel bin ik. Ik kin beter stoppen, want as je joen mond holden, vlaigen der ook gain muggen in.