Geesjen Doddema-Heidema.

Hejje t ook lezen lu?
Der is weer n nij soort kinder ontdekt. De boomerangkinder. Hou kommen ze der op. Ik zeg joe t, t is aal de schuld van de oorlog. Goa mor noa. In de twijde wereldoorlog wuiren der bommen gooid. Wat kreeg je vervolgens? Juust de bevraaiden. En wat gebeurde der?
Net… Trees ontmoette heur Kanedees. En t gevolg doar weer van was dat der n moand of wat loater hail wat onechte kinder in Nederland rondluipen.

Onechte kinder… Doar begreep ik niks van. Onecht, dat is ja kunst. En dij kinder waren toch gain kunst, of wel. As je ze knepen gingen ze ook haard roupen.
Mor in elks geval was der sunds dij tied n bulde te doun rondom kinder. Zo kregen wie noa de oorlog nog weer n eksplosie: de baby-boem. En n poar joar wieder kregen we de zogenoamde BOM-moekes. Wel n kind, mor gain kirrel.
t Gevolg doarvan was: sleudelkinder. Moeke mos aan t waark om senten verdainen, dus t kind mos zuch mor allinneg redden. Der wuir vanzulf ook wel ais n beetje makkelk doan over t eten en zo kregen wie de veurlopers van de petatgeneroatsie.
Om de neudege varioatsie in de petat aan te brengen, haar je nait allinneg meer petat mit of petat zunder, nee je kregen ook nijmoodse zoaken as… petatje oorlog.

En nou t nijste weer: boomerang-kinder. Dat kwam mie zo op t eerste gezicht nait onlogisch veur, omreden der veureg joar ja n onderzuik west het, woaruut konkludeerd is, dat tiedens de doad de manlu heur stramme max nait rechtuut staait mor krom is as n boomerang. Nogal vanzulfsprekend dat doar boomerangkinder van kommen.

Mor nee, zo zat t weer nait, vanzulf. Dit binnen van dij kinder dij aigenlieks al t huus uut binnen, mor nog wel regelmoateg thuuskommen om moeke de waske doun te loaten. Of dij zulfs, as heur studie nait bevaalt, gewoon weer thuus wonen goan. Net n boomerang ja. As t doul veurbieschoten wordt komt dij ook vanzulf weerom.

En nou heurde ik lest n gesprek tussen twij opoes in t bejoardenhuus. De aine zee: "Mouje ais heuren vrouw Venemoa. Dij Patrick van joen Lina, dij is nait traauwd mit dat blonde wichtje toch? En toch hebben ze twij kinder! Dat binnen din ja onechte kinder, vrauw Venemoa!"
En de leste wos aans niks weerom te zeggen as: "Och, vrouw Joager, doar heb ik ja nog nooit bie stilstoan."

Mor ik heb goud nijs veur aal dij opoes , dij zuch in heur haart n beetje schoamen veur dat nijmoodse gedou van heur klaainkinder. Boetenechtelke kinder binnen vandoag de dag trendy. Hailemoal 'in' zeg mor.
Persoonlek vin ik dij konklusie in de kraandekop n beetje kört deur de bochte. Reken mor, dat as ik ain dizzer doagen bie mien man aankommen zol mit de mitdailen dat wie binnen nait aal te laange tied n boetenechtelk kind kriegen zollen, dat dat din ook nog zo 'in' wezen mag, mor dat hai vervast zeggen zol: "Nou mien wicht, din haar ik geern dastoe dien kovvertje pakst en dast der veur t broodeten uut bist. Astoe zo modern wezen wilst, kist wel weerom noar dien moeke… as boomerangkind."