Geesjen Doddema-Heidema.

De wereld versnelt en ale lu kriegen t aalsmor drokker en drokker.
Managers hebben t zo drok, dij kinnen hail nait meer veuruut dinken en doun allinneg nog mor aan körde-termien-planning. Zai binnen al bliede as ze heur vakliteratuur n beetje bieholden kinnen. En dat waarkt ook deur in heur privé-leven. Heur partner en kinder kinnen doar over mitproaten.

As zai dij al hebben teminnend. t Schient dat vraauwelke managers t zo drok, drok, drok hebben mit heur waark dat ze hail gain tied hebben om op zuik te goan noar n partner. En de gevolgen blieven nait uut, vanzulf. Nait allinneg kriegen dij drokke lu zulf last van burn-out-verschiensels. Heur kinder kommen ook in t vergeethoukje.

t Is pas nog onderzöcht, dat lutje beudels dij in n crèche stopt worden, nait goud terechte kommen. Kin je wel noagoan, ja. Pa of moe dumpt heur smörgens vroug al in de opvangschure. Doar binnen te min laaidsters om elk kind genog aandacht te geven. Niks gain verhoaltje bie t in berre stoppen, of even knuvveln, of even aandacht bie t eten. Welnee man, dat is net n lopende band, doarzo. Zo'n laaidster lopt doar mit n pongel kinder onder d'aarm, mikt links en rechts aine in box of berre en mot votdoadelk weer wat aans doun. Drok, drok, drok. n Aandere gript ze der weer uut, dut ze n schone luier om, mor gain tied om even mit heur om te keudeln, hor. Welnee, de volgende wacht alweer.

En dat is nou net hailemoal verkeerd. Kinder hebben veuraal as ze jong binnen aandacht neudeg van n poar vaste personen in heur leventje woar zai zuch aan hechten kinnen. Grode kans dat zai loater emotionele perblemen kriegen in reloatsies. Nou schient t dat ain op de vief kinder geestelke en gedragsperblemen het. Dat kin lieden tot depressies en zulfmoorden. En kinder hebben t zulf ook al zo drok. Ze mouten noar school, noar meziekles, noar voetbal, noar zwemles. As ze gelok hebben worden ze doar deur pa of moe hinbrocht, en aans meschain deur n vaste oppaas.

En houveul van dij stumpers binnen der nait, dij t in t weekend nog drokker hebben omreden zai din mit heur weekendtassie noar pa mouten, dij weer n nije vriendin het. Aal dat gejacht is naargens goud veur. Ze hebben ja gain tied om tot rust te kommen. Ze mouten mitdoun aan aal dat gerun. Drok, drok, drok. Snel, snel, sneller.

Ze mouten neudeg in de grootste rollercoaster van de wereld, dat is snel, dat is "cool". n Gewone draaimeulen is der nait meer bie. Streetcarracen mouten ze tegenswoordeg. Lekker scheuren en mit n bulde lewaaie. Ze zellen heur meziekinstalloatsie wel op vol der bie open draaien, zodat de deuren opbollen deur t gedreun van de bazzen. Dat duurt nait laank meer, din racen ze nait meer noast mekoar, mor op mekoar of. En din mor kieken wel of t eerst uutwieken gaait. Da's aalmoal hail gewoon.

Geef mie toch asjeblieft de tied weerom van siddeln, tiepeln en koeltjestoiten. De tied woarin Jansie t toeffie van de vlechte van Girtje in de inktpot stopde en doarmit de grootste boef van de school wuir. Ach ik wait wel, dat kin ook nait. Mor n beetje gas terugge nemen, mag dat din? Zodat wie mekoar en onszulf nou ais nait aal veurbie lopen. Want kiek, din bin ik al dik tevree.