Geesjen Doddema-Heidema.

Hejje t ook lezen lu? Of hejje t net as ik eerst zo voag in de koamer opvongen van joen kraandelezende partner? Wie mozzen aigenlieks vot, dou mien man zee: "Even wachten, hor. Ik lees net over t Kerstman-effekt." Woarop ik vruig: "Wat is dat din?" En hai zee: "Dat pebaaier ik nou juust te lezen!" Affijn, ik wos t dus nog nait, mor stelde mie der wel van ales bie veur. Want ja, wie hebben kerst ja net achter de rogge en de noa-weeën ebben bie mennegain nog noa.

En….. hebben ie ook zo joen best doan? Onder druk van moatscheppij en media ook mor kerstkedo's kocht dit joar? Man, doar zol je ja n board van kriegen om veur elk en ain n geschikt ditje of datje uut te zuiken. Of was je zat van aal dij kerstfilms op televizie mit laive, zaike, bedraaigde of zielege kerstmannen en bin je twijde kerstdag vlucht noar ain van de meubelboulevards dij open wazzen? Of haar je ook t gevuil, dajje bienoa n kerstman wazzen dij mit zo'n dikke zak aan t torren was, dou je mit joen dikke bosschoppentazzen uut de supermaarkt kwamen? Of hebben ie, tegen beter waiten in, joen haile femilie uutneudegd veur n uutgebraaid diner, doan asof je ze aalmoal even oardeg vonden en intied mit tonen krom in de schounen zeten, terwiel dat je zulf hoast gain hap deur de keel kriegen konden? En mor vrundelk noar elk en aine lachen, net as de kerstman? Of was je zo doen, dat je dochten dat je mit joen arreslee over de snelweg vlogen? As je uut eten west binnen noar n duur restaurant is doar nait veul kans op, omreden de priezen van onder aandern draank zo hoog binnen, dat je joe hoast gain lekker glassie meer vereurloven kinnen.

Of zol kerstman-effekt nou betaiken, dat je noa aal dij schranzerij t lief op de laiste haren. Staarker nog, dat je zo'n uutgezakt kerstmannenlief haren dat de knopen joe zo'n beetje van de rok of broek sprongen en ie nog zo haard ho-ho-ho roupen konden, mor dat der niks meer aan te holden was?

Woar moak ik mie ook weer drok over. Ik kin ja beter eerst ais lezen, woar t echt over gaait. En wat bliekt: in Amerikoa is n onderzuik west. En doaruut bliekt, dat tienerwichter in Amerikoa zuch rond de kerstdoagen veul makkerlker verlaaiden loaten om mit heur vaste verkeren veur de eerste moal t berre in te doeken as om aandere tieden van t joar.

En hou komt dat nou din? Ze vuilen zuch aansproken deur de gezellege sfeer. Boetendes vuilen ze zuch minder onder touzicht stoan van heur olders as in bievubbeld de zummervekantie. Joa, dat is ja gain wonder.

Dij ollu hebben t te drok….. mit bosschoppen doun, huus versieren, eten koken, schoonfemilie ophoalen, doun of ze elk en aine oardeg vinden bie t grode diner. Din hebben ze gain tied vanzulf om op heur dochters te letten. En dat hait nou t kerstman-effekt. Ho-ho-ho as doar mor gain gedonder van komt!