Geesjen Doddema-Heidema.

Hejje t ook lezen lu?
As je op t heden in de verplegen waarken kin joe der van ales overkommen. Zo las ik dat n stuk of wat wiekzusters in Amsterdam lebait worden binnen noa t eten van n toarde. t Bleek gain gewone toarde te wezen, nee, t was n hasj-toarde. Nou haar ik toch aaltied docht dat je doar allinneg mor n beetje vrolek van wuiren, mor dizze vraauwlu hebben of n groot stuk eten, of de bakker haar der flink wat van dat gruine goud instopt, want ze mozzen nait allinneg slim spijen, ze waren ook nog ais hailemoal in toeze. Boetendes sluig heur t haart inains uut de moat. En t slimste is, dat de toarde gewoon bie de bakker om d'houke kocht was, deur ain van de kellegoas dij joareg was.

Zol der aine zo'n toarde besteld hebben, dat de bakker dij verwizzeld het? Of zol d'knecht hom veur aigen gebruuk in nkander kneed hebben? In elks geval zal dit wel gain "Echte bakker" west hebben, mor n vrumde koukebakker.

En din hevve vanzulf nog t schandoal van de weke. Aine dij zien noam nait nuimen wil, het de direkteur van n verpleeghuus in Winschoot n braif schreven, dat zuch der negen van heur waarknemers te boeten goan aan seksewele uutspattens onder waarktied in dat tehuus. En dat nait allinneg, hai (of zai) het ook nog t noambord van t tehuus veraanderd in sekshuus. De direkteur kin en wil mit dij braif niks doun, zee ze veur televizie. En ze het de geruchten ook nait tegensproken, omreden zai wos der lieke veul van as n kadde van t woavelbakken..

Kiek en dat is nou nait te best, volgens n Vloamse hoogleroar psychologie. Dij wait der ales van, omreden hai n bouk schreven het over seks op t waark. "Ze mot votdoadelk uutzuiken of t woar is. En as ze der al wat van heurd haar, is t de vroage of ze der al wat aan doan het. Dat is volledeg uut de haand lopen doar. Meschain mot ze mor vot." Dat kin zo'n Belg op ofstand makkelk zeggen vanzulf. In België hebben ze veur zukse uutspattens strenge regels. Seks op de waarkvlouer is reden veur ontslag op stoande voude. Staarker nog, as de boas der wait van het, mor der niks van zegt, is e schuldeg aan t touloaten van openboare ontucht. Hou zol dat wezen as de boas t aanlegt mit n waarknemer? Doar heur je dij deskundege nait over. Zol e dinken dat dat nait veurkomt? Mor goud, de Vloaming het n onderzuik doan, en doaruut is bleken dat in zaikenhuzen en in de zörgsektor zukse sitewoatsies voaker veurkommen as in aandere bedrieven en instellens.

t Is toch wat mit zukse schandoalen. Elk en aine zit der bovenop. t Wordt in de kraande vermeld, t is veur de televizie en t is in t nijs op de radio. Ik mout joe bekinnen dat ik t al lezen haar in t kraande en al zain haar op televizie. En dou ik in de auto zat, heurde ik t ook nog mit n haalf oor veur de radio. En wait je wat ik dou opains docht? Negen waarknemers. Negen... Din is der toch op zien minst aine bie, dij van twij waaltjes et. Of drije dij... Nou ja, even ofwachten mor, tot de boudel uutzöcht is.