Geesjen Doddema-Heidema.

Hejje t ook lezen lu?

t Leven vaalt nait tou in de wereld van vandoag de dag. Nait veur minsen en ook nait veur daaier. n Dagje kraande lezen levert n buld ellinde op.

Wat te dinken van dij zeehondjes dij dood goan aan de zeehondezaikte. En nou nait dinken: "Och, dat is nog n inde vot". Nee, t eerste slachtovver van dij zaikte is al aantrovven op Vlieland. En zeehondecreche-moeke Lenie moakt zuch alweer drok, dat nait elk en aine genog in de zenen zit over dij zaikte. Dat der minsen binnen dij dinken: "Nou ja, ook al gaait de helfte van dij daaier dood, din binnen der nog aaltied 2500 over. Woar moak je joe drok om". n Vaccin mot der moakt worden. Doar binnen ze al drok mit bezeg, mor ja, dat gaait nait aal te snel en heur aigen zeehondecreche-bewoners goan veur. Aigen honden eerst zogezegd. Komt joe dat bekind veur?

En pony-peerdje wil je ook nait wezen, tegenswoordeg. Doar staait mie zo'n lutje daaier in t gruinlaand rusteg drachteg te wezen en din komt der ain of aandere idioot op t idee dat peerdje, dat gain mins kwoad dut, te wurgen en n poar flinke messteken in t lief te geven.

As Laif-meneerstiekje hejje t ook nait makkelk, traauwens. Doar moak je zo'n haile raaize vanuut Amerikoa, om hier n soortement van VN-missie te holden om de loezen van lindebomen, platoanen en aander stroekerij te vreten. Let wel, eerst lag je lekker mit joen stipkes in de zunne in Californië. Mor goud. Ie hebben ja wel wat over veur joen mit-eerdebewoners en t loon is nait mis, elke dag joen kostje veur t kaauwen, zoveul as je willen. Is mie doar ain of aandere man dij ontdekt het, dat dij tiekjes hier as illegoale waarknemers binnen. Volgens de nije flora- en fauna wet valen ze onder eksotische daaier, dij t netuurleke evenwicht van de ploatselke biotoop bedraaigen.

Mor as je uut tied kommen, wordt der ook mor mit joe aanrötzooid. As mins kin je joe beter nait begroaven loaten in Veenendoal. Doar komt t noamelk regelmoateg veur, dat femilie en vrunden mit aal heur verdrait achter t verkeerde liek aanlopen. Dat raauwcentrum is zo klaain, dat de boudel in toeze lopt. t Is al verschaaiden moal veurkommen, dat lu der op t allerleste mement achterkwamen, dat ze in de verkeerde riege stonden.

En as je as zeehond t loodje leggen, wor je bewoard in n daipvrais-kontainer. Ach, dat is meschain zo maal nog nait, kinnen de maiwen joe teminnend nait aanvreten. Mor schoap of kou wezen bie n knieperge boer, dat is wel t toppunt. Boeren dumpen heur kedoavers tegenswoordeg in knoalen. En dat is nait de schuld van dij boeren, volgens n begriepende bestuurder van de nederlandse land- en toenbaauw-organisoatie. Nee, dij worden door deur de overhaid tou uutlokt, omreden de kosten van t oprumen veuls te hoog binnen.

Je zellen as netuurvrundelke visser mor langs de kaande van zo'n wotter zitten, mit joen hoakje zunder weerhoakje en inainen n kou vangen. Din schrik je joe toch kepot, of nait din.

Is der din hailemoal niks meer aan in dizze wereld?
Tuurlek wel. Want as je din aargens n stukje lezen, dat n bienoa verdrinkende hond deur n zeehond mit de neuze op de wale drokt is, kiek, din is joen dag toch weer hailemoal goud!