|
Week 0206
Nije romantiek.
t Is toch wat mit de laifde en romantische gevuilens. Zo binnen der lu, dij zuchzulf hailemoal nait meer in de haand hebben. En din krieg je kriems-pasjonel. Lu kinnen nait verkroppen dat ze aan kaande schoven binnen en as ze din ook nog zain dat heur ex n nije vlam het, ontsteken zai in blinde woede en doun heur ex of ook de nije partner doarvan wat vrezelks aan. Doar valen maitsttied doden en gewonden bie.
Wat minder gewelddoadeg, mor noar t schient toch slim vervelend veur de slachtovvers, is de seriesmokker dij ze in Kanada noa moanden oppakt hebben. Doar was n man van 56 joar, dij t veuraal op vraauwlu en jonge jonges veurzain haar. Hai muik n proatje mit ze, muik ze wat komplimenten, gaf ze n haand en trok ze doarna noar zoch tou om ze der ongevroagd aine veur te bakken. Ze binnen der nog nait achter wat de motieven van dizze zwoare misdoadeger binnen.
En din hevve nog t gefoevel mit Viagra pillen. Doar schient n groot noadail aan te zitten, noamelk dat dat ding pas noa n uur t zo zwoar verlangde effekt geft. En dat mout nogal vervelend wezen, om zo laank wachten te mouten. Och, ik kin mie der wel wat bie veurstellen. Ik heb wel ais medisienen dij ik n uur veur t eten innemen mout. Ik kom der din maisttied pas achter dat ik dat vergeten bin, as ik de eerste eerappel net aan de vörke prikken wil. Dus nou is der n nije uutvinden doan, in Amerikoa vanzulf. n Neusspray veur snelle sex! Even opsnoeven en hup….. kloar.
En nou mot ik ook nog lezen dat de romantiek in prille reloatsies veraanderd is. Niks gain bozzen rozen, etentjes bie keerslicht of braiven mit n lekker luchie deraan. Nee, tegenwoordeg mouten wie pikante sms-berichtjes aan onze gelaifde sturen. Dat mout din t toppunt van romantiek wezen. Dat zel ik din wel nait meer mitmoaken. Ik heb noamelk hailemoal gain mobiele telefoon. En ik dink der ook beslist nait over om zo'n onding aan te schavven. Mor afijn, as wie dat onderzuik leuven maggen zit t zo: Vraauwlu schienen in de berichten subtiele hints te verwaarken, terwiel dat manlu doarintegen wat pikantere teksten sturen. Van alle Europeoanen motten de Engelsen de maist schunnege berichten sturen.
Nou ja, kinnen zai ook ja niks aan doun. Zai denken dat dat zo heurt, zai hebben ja aalmoal de berichten heurt dij prins Charles via de autotelefoon aan zien scharreltje deurgaf. Zuud-Europeoanen bruken de sms-berichten veur t onderholden van gehaime reloatsies. Nou is t gekke, dat dat onderzuik doan is deur n fabrikant van mobiele telefoons, onder doezend gebrukers van dijzulfde telefoons in hail Europa. Nou, dat lieken mie din zo'n vatteg lu per laand. Nait slim representatief, toch? En ik wil nait veul zeggen, mor t is zo weer Valentijnsdag. Der wordt ons weer van alles deur de strödde drukt. Wie mouten ons gelaifde hoast wel wat kopen, aans binve hopeloos olderwets. Dus n mobieltje din mor?
|
